काठमाडाैं, फागुन २४ ।
नाबालिग गायिका बलात्कारको अभियोगमा प्रहरी हिरासतमा रहेका अभिनेता पल शाहलाई ईलाका प्रहरी कार्यालय गैँडाकोटमा पुर्‍याइएको छ । किशोरीले आफूलाई बलात्कार गरेको अभियोगमा मुद्दा दर्ता गराएको २ सातापछि तनहुँ प्रहरी हिरासतमा रहेका शाहलाई आज प्रहरी कार्यालय गैँडाकोटमा लगिएको प्रहरीले जानकारी दिएको छ ।

फागुन १६ गते गैँडाकोट प्रहरीमा मुद्दा दर्ता गराएकी ती किशोरीको त्यही दिन भरतपुर अस्पतालमा स्वास्थ्य परीक्षण गराइएको थियो । जिल्ला प्रहरीका सूचना अधिकारी दिलिप गिरीले बलात्कारको मुद्दामा अनुसन्धान गर्न शाहलाई ईलाका प्रहरी कार्यालय गैँडाकोटमा राखेर अनुसन्धान सुरु गरेको जानकारी दिए । तनहुँमा पनि उनै किशोरीले शाहले बलात्कार गरेको भन्दै दुई साताअघि मुद्दा दर्ता गरेको विषयमा अनुसन्धान गर्न शाहलाई प्रहरीले हिरासतमा राखेर गरेको अनुसन्धान पूरा भएको छ ।

जिल्ला प्रहरी कार्यालय पूर्वी नवलपरासीले तनहुँ प्रहरीलाई गत आइतबार पत्र पठाउँदै पल शाहविरुद्ध बलात्कारको उजुरी गैँडाकोट प्रहरीमा परेकाले यहाँ पनि उनका बारेमा अनुसन्धान गर्न परेकाले पठाइदिनु भन्दै पत्राचार गरेको थियो । प्रहरीकाअनुसार ती किशोरीले एउटा गीतको छायाँकनको क्रममा गत चैत ७ गते गैँडाकोटको एक होटलमा आफूलाई बलात्कार गरेको भन्दै ईलाका प्रहरी कार्यालय गैँडाकोटमा दुई साताअघि किटानी जाहेरी दिएकी थिइन् ।

गत चैत ७ गते बलात्कार गरेको आरोप पत्रमा उल्लेख भएका कारण आगामी चैतको ६ गतेभित्र अदालतमा मुद्दा दर्ता गरिसक्नु पर्ने जिल्ला प्रहरी कार्यालयलाई बाध्यता छ । गैँडाकोटमा दुई साताअघि दर्ता गराएको निवेदनअनुसार एकै दिनमा सकिने छायाँकनको काम दुई दिन लगाएर गैँडाकोटको होटलमा रक्सी खुवाएर आफूलाई बलात्कार गरेको आरोप किशोरीले लगाएकी छन् ।

त्यतिबेला ईलाका प्रहरी कार्यालय गैँडाकोटमा मुद्दा दर्ता गराउन पीडित किशोरी, उनका बाबु र वकिल आएका थिए । शाहविरुद्ध तनहुँ र नवलपरासी प्रहरीमा बलात्कारको अभियोग लगाएर मुद्दा दर्ता गराउने किशोरी एउटै भएको प्रहरीको भनाई रहेको छ ।