काठमाडौं, जेठ १७ ।
‘कबड्डी– ४’ की नायिका मिरुना मगरविरुद्ध प्रदर्शन सुरु भएको छ । चाबहिलस्थित केएल टावरनजिक व्यापक प्रदर्शन गरिएको हो । प्रदर्शनकारीहरूले नायिका मगरले सार्वजनिक रूपमा माफी माग्नुपर्ने माग गरेका छन् ।

उनीहरूले चलचित्र ‘कबड्डी–४’ को पोस्टरसमेत जलाएका थिए । मिरुनाले आफूमाथि ब्याड टच गरेको भन्दै एक जना बौद्ध भिक्षु फुर्वा लामालाई झापड हानेकी थिइन् । उनले आफूमाथि दुव्र्यवहार गरेको भन्दै प्रहरीको जिम्मा लगाएकी थिइन् ।

प्रहरी हिरासतमा रहेका लामालाई प्रहरीले अभद्र व्यावहारमा अनुसन्धान गरिरहेको छ । बिना कारण भिक्षुलाई फसाएको भन्दै युवाहरूले प्रदर्शन गरेका हुन् । उनलाई छुटाउने विषयमा प्रहरीसँग विभिन्न संघसंस्थाले छलफल गरिरहेका छन् ।

यता चलचित्रका निर्देशक रामबाबु गुरुङले घटनाबारे बुझ्ने काम भइरहेको बताएका छन् । ‘तपाईंहरूबाट नै मैले पनि थाहा पाएको छु । नायिकासँग सम्पर्क भएको छैन । यस विषयमा दुबै पक्षको कुरा सुनेर मात्र हामी अगाडि बढ्छौँ,’ गुरुङले भने ।

उक्त विवादलाई लिएर चलचित्र नै बहिस्कार गर्नुपर्छ भन्ने विषय गलत भएको उनको भनाई रहेको छ ।