काठमाडाैं, असार २१ ।
मिस्टर एण्ड मिस टिन वर्ल्ड नेपालको दोश्रो संस्करण आयोजना हुने भएको छ । फेलिज इन्टरनेशनलले आयोजना गर्ने मिस्टर एण्ड मिस टिन वर्ल्ड नेपालको पहिलो संस्करण २०१७ मा आयोजना गरिएको थियो र विजेता मिस टिन वर्ल्ड नेपाल र मिस्टर टिन वर्ल्ड नेपालले ब्राजिलको साउ पाउलोमा २०१७ को नोभेम्बर १० देखि १६ तारिखसम्म आयोजना भएको मिस टिन वर्ल्ड तथा मिस्टर टिन वर्ल्डमा सहभागिता जनाउने मौका पाएका थिए । मिस्टर टिन वर्ल्ड नेपाल शिर्षक विजेता पंकज सिंह ठकुरी ब्राजिलमा फस्ट रनर अप भएका थिए भने मिस टिन वर्ल्ड नेपाल शिर्षक विजेता स्वस्ती वैद्यले बेष्ट स्माईल तथा बेष्ट नेशनल कस्ट्युम टाईटल हात पार्न सफल भएकी थिइन् ।

मिस्टर एण्ड मिस टिन वर्ल्ड नेपालको दोश्रो संस्करण थप विशेष हुने भएको छ, यस संस्करणका विजेताले टर्कीको इस्तानबुलमा हुने टप मोडल अफ युनिभर्समा प्रतिस्पर्धा गर्ने अवसर पाउने छन् भने यस प्रतियोगिताको नलेज पार्टनर द ब्रिटिस कलेजमा रु. २० लाख रुपैयाँसम्मको छात्रवृत्ति प्राप्त गर्नेछन् । यस प्रतियोगितामा पहिलो हुने प्रतिस्पर्धीले आयोजकका तर्फबाट नगद पुरस्कार रु. १ लाख तथा विभिन्न उपहारहरूसमेत प्राप्त गर्नेछन् भने फस्ट रनर अप तथा सेकेण्ड रनर अपले ब्रिटिस कलेजबाट रु. १५ लाखसम्मको छात्रवृत्ति तथा सम्पूर्ण सहभागीले पहिलो वर्षका लागि ५० प्रतिशत छात्रवृत्ति प्राप्त गर्नेछन् । मिस्टर एण्ड मिस टिन वर्ल्ड नेपाल विजेताहरू १० अक्टुबर २०२२ मा टर्किएको इस्तानबुलमा आयोजना गरिने टप मोडल अफ युनिभर्समा प्रतिस्पर्धामा भाग लिने मौका प्राप्त गर्नेछन् ।

पूर्व मिस नेपाल उषा खड्गी, नायक सलोन बस्नेत, नायक सलिनमान बानियाँ, मोडल पुजा गिरी, कोरियोग्राफर रोजिन शाक्यलगायतका निर्णायक मण्डलले अडिसन तथा विभिन्न प्रतिस्पर्धामार्फत् यस प्रतियोगिताका विजेता छनौट गर्नेछन् । जुलाई १६ मा द ब्रिटिस कलेज, थापाथलीमा आयोजना हुने अडिसनमार्फत् प्रतियोगीहरू सर्टलिस्ट गरिनेछ भने सर्टलिस्ट गरिएका प्रतियोगीहरू विभिन्न किसिमका प्रोजेक्ट वर्क तथा तालिमहरूमा सहभागी हुनेछन् । बैयक्तिक विकास र शीप विकासको उदाहरणीय प्रतियोगिताको रूपमा सञ्चालन गरिने मिस्टर एण्ड मिस टिन वर्ल्ड नेपालले आफ्नो करिअर पाठको खोजीमा रहेका किशाेर किशाेरीको समग्र विकासमा ठूलो मद्दत पुर्‍याउने अपेक्षा गरिएको छ । तसर्थ यो एक प्रतियोगिता मात्र नभई सिकाई र समग्र विकासको अवसरसमेत हो ।

१६ वर्षदेखि २१ वर्ष उमेर समूहका युवाहरूले सहभागिता जनाउन सक्ने यो प्रतियोगिताले आत्मविश्वास, कार्यक्षमता अभिवृद्धि तथा जनसम्पर्क स्थापनामा ठूलो मद्दत पुर्‍याउने छ भने मोडलिङ्ग तथा अभिनय पेशामा आबद्ध हुन चाहनेका लागि अवसर जुटाउन सहायक बन्नेछ । एसईई तथा प्सल टू परीक्षा दिएर बसेका विद्यार्थीहरूको फुर्सदलाई उपयोग गर्दै जीवनको यो क्षणलाई एक उत्पादनशील र अविस्मरणीय बनाउन सकिने आयाेजकले विश्वासले लिएकाे छ ।

प्रतियोगितामा सहभागिता :
१६ देखि २१ वर्ष उमेर समूहका जो कोहीले भाग लिन सक्ने यस प्रतियोगिताको पहिलो चरणको अडिसनका लागि मिस्टर एण्ड मिस टिन वर्ल्ड नेपालको फेसबुक पेजमा गएर अनलाईन फारम भर्नुपर्नेछ । जुलाई १६ मा आयोजना गरिने अडिसनमा छनौट भएका प्रतियोगीलाई विभिन्न तालिम, सेमिनार तथा प्रोजेक्ट वर्कमा सामेल गराई बैयक्तिक विकास गरिनेछ । यसरी तालिममा हुने सहभागिता बापत प्रतियोगीले रु. १५ हजार शुल्क तिर्नुपर्नेछ भने यसरी छनौट हुने हरेक प्रतियोगीले यस प्रतियोगिताको नलेज पार्टनर द ब्रिटिस कलेजमा पहिलो वर्षका लागि ५० प्रतिशत छात्रवृत्ति प्राप्त गर्नेछन् । अन्तिम प्रतियोगिताका विजेताहरूले विभिन्न किसिमका उपहारहरूका साथसाथै नगद पुरस्कार १ लाख रुपैयाँ, टर्किको इस्तानबुलमा हुने प्रतियोगितामा सहभागिता तथा भ्रमणको मौकाका साथै द ब्रिटिस कलेजमा शत् प्रतिशत छात्रवृत्तिसमेत प्राप्त गर्नेछन् ।

आयोजक :
मिस्टर एण्ड मिस टिन वल्र्ड नेपालको आयोजक फेलिज इन्टरनेशनल मनोरञ्जनको दुनियाँमा एक परिचित नाम हो । बलिउडका चर्चित सेलिब्रेटीलाई नेपाली स्टेजमा उतार्ने क्रममा निरन्तर सफलता हाँसिल गर्दै गएको फेलिजले पछिल्लो पटक भारतीय गायिका आस्था गिल र आसिस कौरलाई नेपाली श्राेता माझ पस्किएको थियो । स्थानीयस्तरमा विभिन्न कार्यक्रमहरू निरन्तर गर्दै आएको फेलिजले साँस्कृतिक जनसम्पर्कका माध्यमबाट विश्व र समाजलाई एकताबद्ध बनाउन सकिने विश्वास राखेकाे आयाेजकले एक प्रेस विज्ञप्ति जारी गरी जनाएकाे छ ।