काठमाडाैं, मंसिर १६ ।
बलियो टीम स्पेनलाई हराउँदै जापान कतारमा जारी रहेकाे विश्वकप फुटबलको अन्तिम १६ मा प्रवेश गरेको छ ।

जितसँगै जापान समूह ‘ई’ को समूह बिजेता बन्दै नकआउट चरण प्रवेश गरेको हो । तीन खेल खेलेको जापानले ६ अंक जोडेको छ ।

गएराति कतारको खालिफा अन्तर्राष्ट्रिय स्टेडियममा भएको खेलमा जापानले स्पेनलाई २–१ गोल अन्तरले पराजित गरेको हो ।

जापानको जितमा रित्सु डोन र एओ टानकाले एक-एक गोल गरेका हुन् । स्पेनका लागि अल्भारो मोराटाले एक गोल फर्काएका थिए ।

सुरुवाती अग्रता लिएको स्पेनविरुद्ध जापानले खेल उल्टाएको हो । खेलको ११ औँ मिनेटमा मोराटाले गोल गर्दै स्पेनलाई अग्रता दिलाएका थिए । पहिलो हाफमा पछाडि परेको जापान दोश्राे हाफमा पुनरागमन गर्दै बिजयी भएको हो ।

खेलको ४८ औँ मिनेटमा रित्सुले गोल गर्दै जापानलाई १-१ गाेलको बराबरीमा फर्काएका थिए ।

थप एक गोल खेलको ५१ औँ मिनेटमा टानकाले गरेका थिए ।

जापानसँग पराजित भए पनि तीन खेलमा ४ अंक जोडेको स्पेन यो समूहको उपबिजेता बन्दै नकआउट चरणमा प्रवेश गरेको छ ।