काठमाडाैं, मंसिर १८ ।
कतारमा जारी रहेकाे फिफा विश्वकप फुटबलअन्तर्गत गएराति सम्पन्न भएकाे खेलमा अर्जेन्टिना र नेदरल्याण्ड्स क्वाटर फाइनलमा प्रवेश गरेका छन् ।

अहमेद बिन अलि स्टेडियममा गएराति अष्ट्रेलियालाई २-१ गोल अन्तरले हराउँदै उपाधिकाे दाबेदार अर्जेन्टिना अन्तिम आठमा पुगेको छ ।

अर्जेन्टिनालाई जित दिलाउन कप्तान लियोनल मेस्सी र जुलियन अल्भारेजले एक-एक गोल गरेका थिए ।

अष्ट्रेलियाले एक गोल आत्मघाती उपहार पाएको थियो । विश्वकपको नकआउट चरणमा मेस्सीको पहिलो गोल हो । यस्तै मेस्सीको यस खेल करियरको १००० औँ खेल हो ।

जितसँगै अर्जेन्टिना कतार विश्वकपको क्वाटर फाइनलमा पुग्ने दोश्राे टोली बनेको छ ।

अब अर्जेन्टिनाले क्वाटर फाइनलमा नेदरल्याण्ड्सकाे सामना गर्नेछ । नेदरल्याण्ड्स यसअघि नै क्वाटर फाइनलमा पुगिसकेको छ । अष्ट्रेलिया भने प्रतियोगिताबाट बाहिरिएको छ ।

त्यसैगरी, खालिफा अन्तर्राष्ट्रिय स्टेडियममा शनिबार भएको राउण्ड अफ १६ को खेलमा अमेरिकालाई ३-१ गोल अन्तरले हराउँदै नेदरल्याण्ड्स पनि अन्तिम आठमा पुगेको छ ।

नेदरल्याण्ड्सकाे जितमा मेम्फिस डिपे, डेली ब्लाइन्ड र डेन्जेल डुमफ्रिएसले एक-एक गोल गरे ।

अमेरिकाका हाजी राइटले एक गोल फर्काए ।

यस जितसँगै नेदरल्याण्ड्स कतार विश्वकपको क्वाटर फाइनलमा पुग्ने पहिलो टोली बनेको छ । अब नेदरल्याण्ड्सले क्वाटर फाइनलमा अर्जेन्टिनासँग प्रतिस्पर्धा गर्नेछ ।