काठमाडौं, माघ १६ ।
नाबालिग बलात्कारको मुद्दामा धरौटीमा छुटेका क्रिकेटर सन्दीप लामिछानेलाई पक्राउ गरी थुनामै राख्न माग गर्दै महान्यायाधिवक्ता कार्यालय सर्वोच्च अदालत जाने तयारी गरेको छ ।

उच्च अदालतको पौष २८ गतेको आदेशले छुटेका लामिछानेलाई फेरि पुर्पक्षकै लागि थुनामा राख्न माग गर्दै आज सर्वोच्च जाने तयारी रहेको महान्यायाधिवक्ता कार्यालयका प्रवक्ता सञ्जीवराज रेग्मीले बताए ।

धरौटीमा थुनामुक्त गर्ने उच्च अदालतको आदेशविरुद्ध बिहीबार भएको सर्वोच्च जाने निर्णयानुसार आज सोमबार जाने तयारी भएको रेग्मीले बताए । २० लाख धरौटीमा छाड्ने गरी अदालतले आदेश दिएपछि सन्दीप छुटेका छन् ।

सामान्यतया गम्भीर प्रकृतिका अपराधमा पनि थुनामा राखेरै मुद्दाको पुर्पक्ष गर्ने गर्छ । तीन वर्षभन्दा बढी कैद सजाँय हुने मुद्दामा तत्काल प्राप्त प्रमाणले कसुर भएको देखियो भने अभियुक्तलाई पुर्पक्षका लागि थुनामा पठाउने कानून छ ।

तीन वर्षभन्दा कम सजाँय पाउने कसुरमा आरोप लागेकालाई कसुरको प्रकृति हेरेर धरौटीमा छाड्ने गरिएको छ । सन्दीपको आदेशमा भने प्राप्त प्रमाण हेर्दा थुनामा राख्नैपर्ने अनिवार्य अवस्था देखिएको उच्च सरकारी वकिल कार्यालयको दाबी रहेको छ ।

५ भाद्रमा तिलगंगास्थित एक होटेलमा नाबालिगमाथि जबरजस्ती करणी गरेको भन्दै सन्दीपविरुद्ध २१ भाद्रमा जाहेरी परेको थियो । त्यस बेला उनी नेपाली टोलीसँगै केन्या भ्रमणमा रहेका थिए ।

केन्या भ्रमण बीचमै छाड्दै सन्दीप क्यारेबियन प्रिमियर लिग (सीपीएल) खेल्न जमैका पुगेका थिए । क्यारेबियन लिग छाडेर लामिछाने स्वदेश फर्किए । स्वदेश फर्कँदा उनी २० असोजमा त्रिभुवन अन्तर्राष्ट्रिय विमानस्थलबाट पक्राउ परेका थिए ।

१४ कार्तिकमा जिल्ला अदालत काठमाडौंमा लामिछानेविरुद्ध मुद्दा दायर भयो । १६ कार्तिकमा थुनछेक बहस सुरु भएको थियो । कार्तिक १८ मा उनलाई जिल्ला अदालत काठमाडौंले पुर्पक्षको लागि थुनामा पठायो ।

लामिछानेले भने आफूविरुद्ध लागेको बलात्कार आरोप अस्वीकार गर्दै आफू निर्दोष रहेको र बलात्कार नगरेको बयान दिएका थिए । पक्राउ परेको १ सय दिनपछि उनी २८ पौषमा छुटेका हुन् ।