काठमाडौं, माघ २६ ।
साफ यू–२० महिला च्याम्पियनशीपको फाइनलमा आज नेपालले घरेलु टीम बंगलादेशविरुद्ध प्रतिस्पर्धा गर्दैछ । बंगलादेशविरुद्ध उत्रँदा नेपाल लिग चरणको पहिलो खेलमा व्यहोरेको हारको बदलासहित उपाधि जित्ने लक्ष्यमा हुनेछ ।

गएको शुक्रबारदेखि सुरु भएको प्रतियोगिताको पहिलो खेलमा नेपाल बंगलादेशसंग ३–१ ले पराजित भएको थियो । तर, दोश्रो खेलमा भुटानलाई ४–० र तेश्रो खेलमा उपाधि दाबेदार भारतको चुनौती ३–१ ले पन्छाउँदै नेपालले च्याम्पियनशीपको फाइनल यात्रा तय गरेको थियो ।

पहिलो खेलमा नेपाललाई ३–१ ले हराएको बंगलादेश दोश्रो खेलमा भारतसँग गोलरहित बराबरीमा रोकिएको थियो । तेश्रो खेलमा भुटानलाई ५–० ले पराजित गरेपछि बंगलादेश अपराजित रहँदै फाइनलमा प्रवेश गरेको हो ।
बंगलादेशको ढाकामा नेपाली समयानुसार बेलुका पौने ६ बजेदेखि खेल सुरु हुनेछ ।