काठमाडाैं, फागुन १२ ।
नेपालले यूएईमा जारी रहेकाे आईसीसी यू-१९ पुरुष विश्वकपको एशिया छनोट प्रतियोगितामा विजयी सुरुआत गरेको छ ।

शुक्रबार भएको पहिलो खेलमा सिंगापुरलाई ९६ रनले हराउँदै नेपालले सुखद् सुरुवात गरेको हो । नेपालले दिएको २ सय ६२ रनको लक्ष्यसहित जवाफी ब्याटिङ गरेको सिंगापुरले ५० ओभरमा ७ विकेट गुमाएर १ सय ६५ रन मात्र बनाउन सक्यो ।

सिंगापुरका लागि आर्यन मोदीले ५८ रनको अर्धशतकीय इनिङ खेले । नेपालका हेमन्त धामी र सुवास भण्डारीले २/२ विकेट लिए । विशाल विक्रम केसीले १ विकेट लिए । त्यसअघि टस जितेर पहिले ब्याटिङ गरेको नेपालले ५० ओभरमा ७ विकेट गुमाएर २ सय ६१ रन बनाएको हो ।

नेपालका लागि आकाश त्रिपाटीले ७८ रनको अर्धशतकीय इनिङ खेले । विशाल विक्रम केसीले अविजित ६३ रनको अर्धशतकीय इनिङ खेले । सिंगापुरका लागि आर्यभार चौधरी र अभ्युदय छन्जिरले समान २/२ विकेट लिए । प्रतियोगितामा नेपालसहित सिंगापुर, कुबेत, हङकङ,मलेशिया र आयोजक यूएईको सहभागिता रहेको छ ।

दोश्राे खेलअन्तर्गत नेपालले भोलि शनिबार कुवेतसँग प्रतिस्पर्धात्मक खेल खेल्नेछ । राउण्ड रोबिनका आधारमा हुने प्रतियोगिताको शीर्ष टोली २०२४ मा श्रीलंकामा हुने यू-१९ विश्वकपका लागि छनोट हुने छन् ।