काठमाडाैं, चैत १ ।
एएफसी यू-२० महिला एशियन कप छनोट खेलेर नेपाली यू-२० टोली मंगलबार बिहान स्वदेश फर्किएको छ । नेपाली टोली प्यालेस्टाइनबाट जोर्डन हुँदै मंगलबार बिहान २ बजे त्रिभुवन अन्तर्राष्ट्रिय विमानस्थलमा आइपुगेको हो । प्यालेस्टाइनमा भएको छनोटमा नेपाल दुई खेलमा जित निकाल्दै दोश्राे चरणमा प्रवेश गर्न सफल भएको छ ।

नेपालले पहिलो खेलमा आयोजक प्यालेस्टाइनलाई ६ विरुद्ध शून्य गाेलले पराजित गर्दा नर्दन मारियाना आइल्याण्डमाथि ६ विरुद्ध शून्य गाेलकै जित निकाल्दै दोश्राे चरणमा छनोट हुन सफल भएको थियो । लगातार दोश्राे जितसँगै समूह ‘बी’ मा नेपालले दुई खेलबाट ६ अंक जोड्यो । प्यालेस्टाइन ३ अंक जोडेर दोश्राे स्थानमा रहँदा नर्दन मारियाना आइल्याण्ड अंकविहीन हुँदै पुछारमा रहृयो । यो समूहबाट संयुक्त अरब इमिरेट्स (यूएई) ले अन्तिम समयमा नखेल्ने घोषणा गरेको थियो ।

छनोटमा नेपालकी दीपा शाहीले ६ तथा गरिमा राईले दुई गोल गरेकी थिइन् । यस्तै, सारा बज्राचार्य, सरस्वती हमाल, प्रीति राई र जेनिफर राणाले समान एक-एक गोल गरेकी थिइन् । पहिलो चरणबाट आठ समूहको बिजेता टोली दोश्राे चरणमा प्रवेश गर्नेछन् । दोश्राे चरणमा आठ टोलीलाई दुई समूहमा विभाजन गरिनेछ । जसबाट उत्कृष्ट चार टोलीले उज्वेकिस्तानमा हुने यू-२० महिला एशियन कप खेल्नेछन् ।

एएफसी यू-२० महिला एशियन कप सन् २०२४ को मार्च ३ देखि १६ सम्म उज्वेकिस्तानमा हुँदैछ । आयोजक उज्वेकिस्तानसहित २०१९ को बिजेता जापान, दोश्राे भएको उत्तर कोरिया र तेश्राे भएको दक्षिण कोरिया गरी चार टोली छनोट भइसकेका छन् ।

दोश्राे राउण्डका खेलहरू ३ देखि ११ जुनसम्म हुनेछन् । पहिलो चरणबाट चीन, नेपाल, अष्ट्रेलिया, लेबनान, चाइनिज ताइपेई, भियतनाम, म्यानमार र इरान छनोट हुन सफल भएका छन् । पोट १ मा अष्ट्रेलिया र चीन, पोट २ मा भियतनाम र म्यानमार, पोट ३ मा इरान र नेपाल तथा पोट ४ मा लेबनान र चाइनिज ताइपेई रहेका छन् ।