काठमाडाैं, चैत २ ।
आईसीसी विश्वकप लिग-२ त्रिकोणात्मक ओडिआई सिरिजअन्तर्गत अन्तिम खेलमा यूएईमाथि कीर्तिमानी जित निकाल्दै नेपाल एकदिवसीय विश्वकप छनोटमा पुगेको छ ।

कीर्तिपुरस्थित त्रिवि क्रिकेट मैदानमा आज बिहीबार भएको खेलमा डकवर्थ लुईस नियमानुसार नेपालले यूएईलाई ९ रनले पराजित गरेको हो । योसँगै नेपाल जिम्बावेमा हुने एकदिवसीय विश्वकप ग्लोबल छनोटमा खेल्न पाउने भएको छ । त्रिवि क्रिकेट मैदान, कीर्तिपुरमा पहिले ब्याटिङ गरेको यूएईले ५० ओभरमा ६ विकेट गुमाएर ३१० रन बनाएको थियो । जवाफमा मैदान उत्रिएको नेपालले ४४ ओभरमा ६ विकेटको क्षतिमा २६९ रन बनाउँदा खेल रोकियो र डिएल मेडथका आधारमा नेपाल ९ रनले विजयी घोषणा भएकाे हाे ।

यसअघि, टस जितेर पहिले ब्याटिङ गरेको यूएईले पूरा ५० ओभरमा ६ विकेट गुमाएर ३१० रन बनाएको थियो । नेपालले सुरुवाती १० ओभरमा ३ विकेट गुमाउँदै ५२ रन बनाएको थियो । खराब सुरुवात गरेको नेपालका लागि मध्यक्रमका ब्याटरले उत्कृष्ट प्रदर्शन गरे । यूएईमाथि जित निकाल्न नेपालका चार ब्याटरले अर्धशतकीय पारी खेले ।

यसैबीच, प्रधानमन्त्री पुष्पकमल दाहाल प्रचण्डले यूएईविरुद्ध डीएलएस मेथडबाट नौ रनको जित निकालेको नेपाली राष्ट्रिय क्रिकेट टीमलाई बधाई दिएका छन् ।

जितसँगै आईसीसी विश्वकप क्रिकेट लिग-२ को अंकतालिकामा शीर्ष तीनभित्र रहँदै एकदिवसीय विश्वकप छनोटमा पुग्न सफल भएको नेपाली टोलीले नेपालको स्वाभिमान र गौरव उँचो राख्न सफल भएको भन्दै उनले प्रशंसा गरेका छन् ।

“आईसीसी क्रिकेट विश्वकप लिग-२ मा यूएईलाई हराउँदै नेपाल विश्वकप छनोटमा पुग्न सफल भएकोमा हार्दिक खुसी व्यक्त गर्दछु,” उनले भनेका छन्, “लिगका खेलहरूमा उच्च कौशलता प्रदर्शन गर्दै नेपालको स्वाभिमान र गौरव उँचो राख्न सफल भएकोमा उच्च प्रशंसासहित नेपाली क्रिकेट टीम, प्रशिक्षक, क्यानलगायत हामी सबैलाई हार्दिक बधाई !”