काठमाडाैं, चैत ५ ।
बुटवलमा जारी रहेकाे २२ औँ तिलाेत्तमा गाेल्डकपअन्तर्गत आज भएकाे खेलमा थ्री स्टार क्लब हिमालयन शेर्पा क्लबलाई पराजित गर्दै सेमिफाइनलमा प्रवेश गरेको छ ।

बुटवल देवीनगरस्थित एन्फा एकेडेमीको खेल मैदानमा भएको प्रतिष्प्रर्धात्मक दोश्राे खेलमा हिमालयन शेर्पा क्लबलाई १ शून्य गोलले पराजित गर्दै थ्री स्टारले सेमिफाइनलको यात्रा तय गरेको हो ।

पहिलो हाफ गोलरहित बराबरीमा टुंगिए पनि दोश्रो हाफमा थ्री स्टारका दिपेश गुरुङले गोल गरेका थिए । दोश्राे हाफमा मैदान प्रवेश गरेका मिन धिमालको उत्कृष्ट पासमा गुरुङले गरेको एक मात्र गोल नै थ्री स्टारलाई सेमिफाइनलमा पुर्‍याउने निर्णायक गोल बन्न पुगेकाे हाे ।

आजको खेलमा थ्री स्टार क्लब र हिमालयन शेर्पाका खेलाडीले एक–एक वटा पहेँलो कार्ड पाएका थिए । खेलको पहिलो हापमा थ्री स्टारका पिटर सेगनले पहेँलो कार्ड पाए भने दोश्रो हाफमा हिमालयन शेर्पाका बिसन लिम्बुले पहेँलो कार्ड पाएका थिए ।

प्रतियोगितमा थ्री स्टारका लकिन लिम्बु म्यान अफ दी म्याच घोषित हुँदै नगद ११ हजार १ सय ११ रुपैयाँ नगद पुरस्कार प्राप्त गरे ।

जिल्ला फुटबल संघ रूपन्देहीको आयोजनामा सञ्चालित गोल्डकप प्रतियोगितामा दुई विभागीयसहित ८ टीमको सहभागिता रहेकाे छ । भाेलि सोमबार फ्रेन्ड्स क्लब र नेपाल सशस्त्र प्रहरी क्लबबीच खेल हुने आयोजकले जनाएको छ ।

चैत ११ गतेसम्म चल्ने प्रतियोगितामा बिजेताले गोल्डकप सँगै ११ लाख ११ हजार १ सय ११ रुपैयाँ नगद पुरस्कार प्राप्त गर्नेछ । त्यस्तै उपबिजेताले ५ लाख ५५ हजार ५ सय ५५ रुपैयाँ पुरस्कार प्राप्त गर्नेछ ।

प्रतियोगितामा सर्वोत्कृष्ट खेलाडीले एक लाख रुपैयाँ वा एक थान मोटरसाइकल पुरस्कार पाउँदा उत्कृष्ट फरवार्ड, गोलरक्षक, मिड फिल्डर, डिफेन्स र कोचले जनही ३० हजारका दरले नगद पुरस्कार प्राप्त गर्ने छन् ।