काठमाडौं, बैशाख ८ ।
राष्ट्रिय क्रिकेट टोलीका स्पिनर सन्दीप लामिछानेले एसीसी प्रिमियर कपअन्तर्गत ओमानविरुद्धको खेलमा एक विकेट लिएपश्चात् दुर्लभ विश्व कीर्तिमान आफ्नो नाममा राख्न सफल भएका छन् ।

सन्दीपले आजको खेलमा एक विकेट लिएसँगै क्रिकेट इतिहासमा सबैभन्दा छिटो १ सय विकेट लिने विश्व कीर्तिमान आफ्नो नाममा राख्न सफल भए । सन्दीपले यसअघि ४१ खेलमा ९९ विकेट लिइसकेका थिए । आजको खेलमा एक विकेट लिएपछि ४२ खेलमा सय विकेट पुगेकाे हाे ।

सन्दीप ओडीआईमा ५० विकेट सर्वाधिक छिटो पूरा गर्ने विश्वको दोस्रा खेलाडी हुन् । ओडीआईमा सन्दीपले २२ खेलमा ५० विकेट पूरा गरेका थिए ।

यसअघि ओडीआईमा सर्वाधिक छिटो सय विकेट पूरा गर्ने कीर्तिमान अफगानिस्तानका राशिद खानको नाममा रहेको छ । रसिदले ४४ खेलमा सय विकेट लिएका थिए ।

दोस्रो स्थानमा रहेका अस्ट्रेलियाका मिचेल स्टार्कले ५२ खेलमा सय विकेट लिएका थिए । पाकिस्तानका सक्लैन मुश्ताकले ५३, न्युजिल्याण्डका शेन बोन्ड र बंगलादेशका मुश्ताफिजर रहमानले ५४ खेलमा सय विकेट झारेका थिए ।

सन्दीपले सन् २०१८ मा नेदरल्यान्ड्सविरुद्धको खेलमा ओडीआईमा डेब्यु गरेका थिए । सन्दीपले ती ओडीआई खेलमा ५ विकेट झारेका छन् । ओडीआईमा नेपालबाट सय विकेट लिने सन्दीप पहिलो बलर बन्नेछन् ।

सन्दीपपछि ओडीआईमा सर्वाधिक विकेट लिने खेलाडीको दोस्रो स्थानमा सोमपाल कामी छन् । सोमपालले ४४ खेलमा ६१ विकेट लिइसकेका छन् । करण केसीले ३८ खेलमा ५६ विकेट आफ्नो नाममा गरेका छन् ।