काठमाडौं, बैशाख १९ ।
नेपाल २१ वर्षपछि एशिया कपमा छनोट भएको छ । आज मंगलबार काठमाडौंको कीर्तिपुरस्थित टीयू क्रिकेट मैदानमा भएको एसीसी प्रिमियर कपको फाइनलमा यूएईलाई ७ विकेटले पराजित गर्दै नेपाल एशयिया कपमा छनौट भएको हो ।

एशिया कपमा छनोट भएसँगै अब नेपालले बलियो टोली भारत र पाकिस्तानसँग इतिहासमै पहिलो पटक प्रतिस्पर्धा गर्नेछ । एशिया कप २०२३ आगामी सेप्टेम्बरमा पाकिस्तानमा हुनेछ ।

नेपाल, भारत र पाकिस्तान एकै समूह ‘ए’ मा छन् । समूह ‘बी’ मा बंगलादेश, श्रीलंका र अफगानिस्तान छन् । सन् २००२ मा सिंगापुरमा भएको एसीसी ट्रफीको फाइनलमा स्थान बनाउँदै नेपालले एशिया कपमा पुगेको थियो । त्यो समय फाइनल पुग्ने दुई टोली एशिया कपमा पुग्ने गर्दथे । उक्त फाइनलमा नेपाल यूएईसँग ६ विकेटले पराजित भएको थियो ।

तर, भारत र पाकिस्तानको आन्तरिक राजनीति र विवादको कारण त्यो वर्ष एशिया कप नै रद्द भएको थियो । त्यसकै कारण नेपाल एशिया कपमा पुगेर पनि खेल्न पाएको थिएन । त्यसपछि नेपाल एशिया कपमा छनोट हुन सकेको थिएन ।

अहिले पनि भारत र पाकिस्तानबीच विवाद कायमै छ । भारतले पाकिस्तानमा हुने प्रतियोगितामा भाग नलिने अडान लिइरहेको छ । भारत पाकिस्तानमा खेल्न जान नमाने कि खेल स्थल परिवर्तन गर्नुपर्ने हुन्छ कि त खेल नै रद्द हुने स्थिति रहन्छ ।

यसैबीच, सन्दीप लामिछाने एसीसी प्रिमियर कप क्रिकेटको सर्वोत्कृष्ट खेलाडी बनेका छन् ।

आज सम्पन्न प्रतियोगितामा लामिछाने सर्वाधिक विकेट लिनेमा उनी दोश्रो खेलाडी हुन । उनले ५ खेलमा १३ विकेट लिन सफल भएका हुन् ।

सर्वोत्कृष्ट बलरको उपाधि भने ओमानका बिलाल खानले पाएका छन् । खानले सर्वाधिक १७ विकेट लिन सफल भएका थिए ।

त्यसैगरी, सर्वोत्कृष्ट ब्याट्सम्यानको उपाधि यूएईका भृत्य अरविन्दलाई दिइएको छ ।  प्रतियोगितामा दुई वटा १ सय ५० माथिको स्कोरसहित सर्वाधिक रन बनाएर रेकर्ड कायम गरेका छन् ।