काठमाडौं, जेठ ५ ।
नेपाली मुलकी बलिउड अभिनेत्री मनिषा कोइराला चर्चित कमेडि शो ‘द कपिल शर्मा शो’ पुगेर मस्ति गरेकी छन् । यसअघि मनिषा कोइराला ‘कपिल शर्मा शो’ मा सहभागी भएका फोटोहरू मात्र सार्वजनिक भएका थिए ।

आगामी साता शनिबार या आइतबार प्रशारण हुने ‘द कपिल शर्मा शो’ को प्रोमो सोनि टिभीले प्रशारण गरिरहेको छ । जसमा कपिल शर्माले नेपालको बारेमा कुराकानी गरेका छन् । उक्त प्रोमोमा जब मनिषा कोइरालाको इन्ट्रि हुन्छ, कपिल शर्माले स्वागत गर्दै सोध्छन् ‘यति ढिलो हाम्रो शोमा किन आउनुभयो ? योगि जि (उत्तर प्रदेशका मुख्यमन्त्री हुन) मुख्यमन्त्री बन्नलाई पर्खिनु भएको थियो ?’ त्यसपछि मनिषा कोइराला र दर्शकहरू हाँस्छन् । कपिलको प्रश्नपछि नभजोत सिंह सिद्धुले मनिषाप्रति लक्षित गर्दै कपिललाई भन्छन– ‘प्रधानमन्त्री परिवारकी हुन् ।’

अर्को प्रसंगमा सुमोना चक्रवतीले मनिषा कोइरालासँग कुरा गर्दै नेपालसँग आफ्नो राम्रो सम्बन्ध रहेको बताउँछिन् । त्यसपछि ‘के सम्बन्ध छ’ भनेर सिद्धुले सुमोनालाई सोध्छन् । सुमोनाले भन्छिन– ‘मेरो बुवा र आमा हनिमुनका लागि नेपाल जानुभएको थियो ।’ त्यसपछि कपिल शर्मा शो मा हाँसोको फोहोरा छुट्छ । यसअघि पनि कपिल शर्मा शो मा नेपालको प्रशंग उठ्दै आएको थियो । साथै नेपालका बारेमा अरू यस्ता धेरै प्रसंग उक्त शोमा बारम्बार आउने गर्छन् ।

https://www.facebook.com/sonytelevision/videos/1431119463577479/