काठमाडौं, जेठ ९ ।
नेपाली मूलकी बलिउड नायिका मनीषा कोइरालाले आफूले हतारमा सोच विचार नगरी बिहे गरेको निर्णयप्रति पश्चाताप गरेकी छन् ।
सात वर्ष पहिले सन् २०१० मा मनीषाले नेपाली व्यापारी सम्राट दाहालसँग विवाह गरेकी थिइन् । विवाहको दुई वर्षपछि सन् २०१२ मा सम्बन्धविच्छेद भएको थियो ।

आफ्नो कमब्याक फिल्म ‘डियर माया’को प्रोमोसनमा रहेकी मनीषा कोइरालाले एक भारतीय मिडियासँगको कुराकानीमा भनिन, ‘हो, म आफ्नो विवाहको निर्णयलाई गलत मान्छु । यो कुराको पूरा जिम्मेवारी म आफैं लिन्छु किनभने उक्त विवाह मैले निकै हतारमा गरेकी थिएँ । यस विषयमा मैले निकै सोच विचार गर्नु पर्दथ्यो जुन मैले गरिनँ । म यसबारे योभन्दा बढी केही पनि भन्न सक्दिनँ ।’

मनीषा कोराला भनिन, ‘आजकालका युवायुवतीहरूसँग म निकै प्रभावित छु । आजकालका युवायुवती निकै बोल्ड छन् । उनीहरूले आफूलाई निकै राम्रोसँग चिनेका छन, उद्देश्य लिन्छन् र आफ्नो लक्ष्यसम्म पुग्छन् । मलाई आजका युवायुवतीहरू निकै राम्रा लाग्छन् । यस्तै हुनुपर्छ किनभने हामीले एउटै जिन्दगी पाउँछौं ।’

नयाँ महिला निर्देशक सुनैना भटनागरको निर्देशनमा तयार मनीषाको फिल्म ‘डियर माया’ जून २ तारिखमा रिलिज हुँदैछ । यो फिल्मपछि मनीषा राज कुमार हिरानीको निर्देशनमा बनिरहेको संजय दत्तको बायोपिकमा नरगिस दत्तको भूमिकामा देखिनेछन् ।