काठमाडाैं, भाद्र १० ।
डिफेन्डिङ च्याम्पियन भारतलाई टाइब्रेकरमा पराजित गर्दै बंगलादेशले साफ यू-२० च्याम्पियनशीपको फाइनलमा नेपालसँगको भेट पक्का गरेको छ ।

ललितपुरकाे सातदोबाटोस्थित एन्फा कम्प्लेक्समा आज साेमबार भएको दोश्राे सेमिफाइनलमा बंगलादेशले भारतमाथि टाइब्रेकरमा ४-३ गोल अन्तरले पराजित गर्दै प्रतियोगिताको फाइनलमा पुगेको हो । त्यस्तै आइतबार भएको पहिलो सेमिफाइनल खेलमा नेपालले भुटानलाई टाईब्रेकरमा ४-१ गाेलले पराजित गरेको थियो ।

आज खेलको निर्धारित ९० औँ मिनेटमा दुबै टोलीले १-१ गोलको बराबरी खेलेपछि खेल टाइब्रेकरमा पुगेको हो । टाइब्रेकरमा बंगलादेशका अहमेद नोभा, मोइनुल स्लाम, साकिल तोपु र मोहम्मद आसिफले गोल गरे ।

भारतका लागि परमवीर, ग्वाङ्गसार गोएरी र मनजोत सिंहले गोल गरे भने केल्भिन सिंह र आकाश टिर्के गोल गर्नबाट चुके । त्यसअघि खेलको ३७ औँ मिनेटमा बंगलादेशका असदुल मोल्लाले गोल गर्दै टोलीलाई पहिलो अग्रता दिलाए ।

त्यस्तै, भारतले खेलको ७५ औँ मिनेटमा बराबरी गोल फर्काए । भारतका लागि ग्वाङ्गसार गोएरीले गोल गर्दै खेललाई एक/एक गोलको बराबरीमा ल्याए । खेलको दोश्राे हाफको अतिरिक्त समयमा बंगलादेश १० खेलाडीमा समेटिएको थियो ।

बंगलादेशका कामासाइ मार्माले दोहोरो पहेँलो कार्ड ब्यहोर्दै मैदानबाट बाहिरिएका थिए । तर त्यसको सदुपयोग भने भारतले गर्न सकेन । साफ च्याम्पियनशीपको उपाधीको लागि नेपाल र बंगलादेशबीच प्रतिस्पर्धा हुनेछ । यहीँ भाद्र १२ गते बुधबार हुने फाइनल खेल त्रिपुरेश्वरस्थित दशरथ रङ्गशालामा हुने भएकाे छ ।