काठमाडाैं, भाद्र १९ ।
काठमाडौं महानगरपालिकाले पेरिस पारालिम्पिक, २०२४ मा काँस्य पदक प्राप्त गर्ने पारा तेक्वान्दो खेलाडी पलेशा गोबर्धनलाई पाँच लाख नगदसहित सम्मान गरेको छ ।

महानगरपालिका कार्यालय काठमाडौं प्लाजामा आज बुधबार आयोजना गरिएको कार्यक्रममा महानगरपालिकाका प्रमुख बालेन्द्र शाह (बालेन)ले सम्मान-पत्र तथा उप-प्रमुख सुनिता डंगोलले पलेशालाई रु. पाँच लाखको चेक हस्तान्तरण गरेका हुन् ।

सम्मान कार्यक्रममा महानगरपालिकाका प्रवक्ता नवीन मानन्धर, सामाजिक समितिका संयोजक रामकुमार केसी, तेक्वान्दो एशोसिएशनका अध्यक्ष प्रकाश शमशेर राणा, ओलम्पियन संगीना वैद्य, पलेशाका मातापिता पनिता र प्रदीप गोबर्धनसहित खेल क्षेत्रका पदाधिकारी तथा खेलाडीहरूको सहभागिता रहेको थियो ।

पलेशाले गत शुक्रबार फ्रान्सको पेरिसमा भएको पारालिम्पिक्समा के-४४ विधाअन्तर्गत महिला ५७ किलो मुनिको तौल समूहमा काँस्य पदक प्राप्त गरेकी थिइन् । उनले उक्त प्रतिस्पर्धामा सर्मबियाली मरिजा मिकेभलाई १५-८ अंकले पराजित गरेकी थिइन् । ओलम्पिकमा नेपाली खेलाडीले प्राप्त गरेको यो नै पहिलो पदक हो ।