काठमाडाैं, भाद्र २४ ।
छोरीको हत्या गरी खोलामा फालेको आरोपमा प्रहरीले आमालाई पक्राउ गरेको छ । भर्खरै २३ महिनाकी आफ्नी छोरी पृन्सिका भण्डारीको हत्या गरी ललितपुरस्थित ठोस्ने खोलामा फालेको आरोपमा २१ वर्षीया प्रमिला भण्डारीलाई पक्राउ गरिएको ललितपुर प्रहरीले जनाएको छ ।

प्रहरीकाअनुसार प्रमिलाले आफ्नी छोरी पृन्सिकालाई कुटपिट गरेर बेहोस भएपछि खोलामा फालेको खुलेको छ ।

श्रावण २७ गते कुटपिट गरेर खोलामा फालेपछि उनले खोजीका लागि प्रहरीमा निवेदन दिएकी थिइन् । श्रावण २८ गते पृन्सिका ठोस्ने खोलामा रुखको हाँगामा अड्किएको अवस्थामा मृत भेटिएको प्रहरीले जनाएको छ ।

प्रमिलालाई आज सोमबार पक्राउ गरी कर्तव्य ज्यानसम्बन्धी कसुरमा उजुरी दर्ता गरी ललितपुर जिल्ला अदालतबाट अनुमति लिएको प्रहरीले जनाएको छ । उनीमाथि थप अनुसन्धान अगाडि बढाइएको प्रहरीले जनाएको छ ।