एजेन्सी, कार्तिक १९ ।
अस्ट्रेलियाको मेलबर्नमा पर्ने सेन्ट अल्बन्समा एक नेपाली युवकको आगलागीमा परी मृत्यु भएको छ ।

आगलागीमा परेर काठमाडौंको कीर्तिपुर नगरपालिका वडा नम्बर-४ भत्केपाटी गाम्चाका ३४ वर्षीय विशाल केसीको मृत्यु भएको हो ।

अहिले उनको पोस्टमार्टम र अरू कानूनी प्रक्रिया भइरहेको उनका पारिवारिक सदस्यले बताएका छन् । यो प्रक्रिया सकिएपछि शव नेपाल ल्याउने प्रक्रिया अघि बढाइने केसीका आफन्त सुशील बाँस्कोटाले बताए ।

केसी केही साथीहरूसँग बसिरहेका थिए । उनी बसिरहेकै घरमा आइतबार भएको आगलागीमा परेर उनको निधन भएको हो । आगलागीको खबर प्राप्त भएपछि उद्धारका लागि तत्कालै पुगे पनि उनलाई बचाउन नसकिएको अग्नि नियन्त्रकले स्थानीय सञ्चार माध्यमलाई बताएका छन् ।

केसीका छिमेकीहरूले त्यहाँका सञ्चार माध्यमलाई बताएअनुसार, शनिबार साँझ केसीले साथीहरूसँगै तिहारको रमाइलो गरेका थिए । तर, बिहानै उनी बसेको ठाउँमा आगो लागेपछि भाग्न सकेनन् । उद्धारकहरूको प्रयास पनि सफल हुन सकेन ।

बाँस्कोटाकाअनुसार, केसीको विवाह भएको थिएन । उनी १० वर्षअघि अस्ट्रेलिया गएका थिए । गैर आवासीय नेपाली संघ र नेपाली दूताबाससँग समन्वय गरी शव ल्याउनका लागि पहल भइरहेको उनले बताए ।

केसीले अस्ट्रेलिया जानुअघि केही समय काठमाडौंको हिमालय टेलिभिजनमा पनि काम गरेका थिए ।