काठमाडाैं, कार्तिक २० ।
पोखरामा राष्ट्रिय स्वतन्त्र पार्टीका सभापति रवि लामिछानेको समर्थनमा भएको प्रदर्शनका क्रममा एक जना प्रहरीमाथि हातपात भएको छ ।

आज मंगलबार दिउँसो पोखरास्थित वाई चोकमा सादा पोसाकमा खटिएका प्रहरीमाथि रास्वपाका कार्यकर्ताहरूले हातपात गरेको जिल्ला प्रहरी कार्यालय कास्कीले जनाएको छ ।

निषेधित क्षेत्रनजिक भएको प्रदर्शनका क्रममा प्रदर्शनकारीले उनीमाथि कुटपिट भएसँगै त्यहीँ खटिएका सहकर्मी प्रहरीले उद्धार गरेका थिए । उनीमाथि मुक्का प्रहार हुन थालेपछि प्रहरीले उद्धार गरेको जनाइएको छ ।

प्रहरीले कुटपिट भएका आफ्नो कर्मचारीको परिचय खुलाएको छैन ।

रास्वपाका सभापति रवि लामिछानेको आज म्याद थपबारे निर्णय हुने भएपछि बिहानैदेखि समर्थकहरूले पोखरामा प्रदर्शन गरेका थिए । लामिछाने कार्तिक २ गते सहकारी ठगी बारेको अनुसन्धानका लागि काठमाडौंबाट पक्राउ परेका थिए ।

यसैबीच, सभापति लामिछाने पक्राउको विरोधमा उत्रिएका ८ जना प्रदर्शनकारीहरूलाई प्रहरीले पक्राउ गरेको छ । मंगलबार दिउँसो विरोधमा उत्रिएका उनीहरूले निषेधित क्षेत्र तोड्न खोजेपछि पक्राउ गरिएको प्रहरीले जनाएको छ ।

पक्राउ परेकाहरूलाई वडा प्रहरी कार्यालय, बैदाम लगिएको छ । हाल लामिछानेलाई कास्कीस्थित जिल्ला प्रहरी कार्यालय पोखराको हिरासतमा राखिएको छ ।

रविलाई आजै म्याद थपका लागि अदालत लगिएको छ । रास्वपाका कार्यकर्ताहरू पोखराको रत्न चोक हुँदै वाइ चोकलगायतका क्षेत्रमा प्रदर्शन गरिरहेका छन् ।

आन्दोलनमा उत्रिएका कार्यकर्ताहरूले निषेधित क्षेत्र तोड्न थालेपछि प्रहरीले अश्रु ग्याँससमेत प्रहार गरेको थियो ।

कार्तिक २ गते पक्राउ परेका लामिछानेविरुद्ध जिल्ला अदालत कास्कीले कार्तिक ८ गते दोश्राे पटक ७ दिन म्याद थप गरेको थियो ।