काठमाडाैं, कार्तिक २० ।
मानव बेचबिखन तथा ओसार-पसार मुद्दामा इन्टरपोलबाट ‘रेड नोटिस’ जारी भएका फरार प्रतिवादी धनुषा जनकनन्दिनी गाउँपालिका-४ का दिलिप राउत पक्राउ परेका छन् । एनसिबी कुबेतको समन्वयमा कुबेतमा पक्राउ परेका उनलाई आज मंगलबार नेपाल फिर्ता ल्याइएको प्रहरीले जनाएको छ ।

मानव बेचबिखन तथा ओसार-पसार मुद्दामा संलग्न रही फरार रहेका उनलाई अन्तर्राष्ट्रियस्तरमा खोजतलास गर्न इन्टरपोल शाखाको अनुरोधमा गत असोज १८ गते ‘रेड नोटिस’ जारी गरिएको थियो ।

उनलाई सम्बन्धित कसुरबमोजिम कानूनी कारबाहीका लागि मानव बेचबिखन अनुसन्धान ब्यूरोलाई बुझाइएको प्रहरी प्रधान कार्यालयस्थित इन्टरपोल शाखाले जनाएको छ ।