काठमाडाैं, कार्तिक २२ ।
थाइ एयरवेजको जहाजमा एकाएक प्राविधिक समस्या उत्पन्न भएपछि आज बिहीबार दिउँसोको उडान रद्द भएको छ । बिहीबार दिउँसो १ बजेर २५ मिनेटकाे समयमा उडान तालिका रहेको उक्त जहाजमा प्राविधिक समस्या देखिएको त्रिभुवन अन्तर्राष्ट्रिय विमानस्थल कार्यालयले जनाएको छ ।

राति १२ बजे थाइको अर्को जहाज बैंककबाट काठमाडौं आउने विमानस्थलका महाप्रबन्धक जगन्नाथ निरौलाले जानकारी दिएका छन् । सो जहाजमा केही प्राविधिकसहित स्पेयर पार्टस् ल्याएर मर्मत गर्ने कम्पनीको तयारी रहेको पनि उनले जानकारी दिए । बिहीबार २ सय ९६ जना यात्रुहरू काठमाडौंबाट बैंकक जाने तयारी अवस्थामा रहेका थिए । आजका लागि थाइको जीएसए सोसाइटी इन्टरनेशनलले सबै यात्रुहरूलाई होटलमा बस्ने व्यवस्था मिलाएको उनले जानकारी दिएका छन् ।