एजेन्सी, कार्तिक २३ ।
हङकङको युनलङमा कारले ठक्कर दिँदा एक नेपाली विद्यार्थीको मृत्यु भएको छ । स्थानीय समयानुसार बिहीबार बिहान कलेज जाने क्रममा कारले ठक्कर दिँदा १९ वर्षीया छात्राको मृत्यु भएको हो ।

बिहान ८ बजेतिर अनलक रोडमा बाटो पार गर्ने क्रममा किशोरीलाई कारले ठक्कर दिएको थियो । ठक्कर दिएकाे उक्त कार ३० वर्षीय चालकले हाँकेका थिए । कार क्यासल पिक रोडतर्फ जाँदै गरेकाे थियो ।

कारले किशोरीलाई ठक्कर दिएपछि घटनास्थल पुगेका स्वास्थ्यकर्मी तथा प्रहरीले उनलाई बेहोस अवस्थामा अस्पताल पुर्‍याएका थिए ।

सुरुमा उनलाई पोकओइ अस्पताल लगिएको थियो । पछि चुनमुन अस्पतालतर्फ रिफर गरिएकाे थियाे । जहाँ उनको शल्यक्रिया गरिएको थियो तर, उनलाई बचाउने प्रयास भने सफल हुन सकेन । अस्पताल श्राेतकाअनुसार उनको दिउँसो २ बजेर ६ मिनेटमा मृत्यु हुन पुग्याे ।

स्थानीय सञ्चारमाध्यम डिमसम डेलीकाअनुसार कारको ठक्करबाट मृत्यु हुनेमा लिसा नामकी नेपाली विद्यार्थी रहेकी छन् ।

पीडित किशोरीकी दिदी जिसालाई उद्धृत गर्दै समाचारमा उल्लेख भएअनुसार उनीहरू दुबै जना हङकङमै जन्मेका हुन् । ताइवाइस्थित ओलङ्गन विश्वविद्यालयमा डिप्लोमा तहमा अध्ययनरत लिसा कलेज जाने क्रममा दुर्घटनामा परेकी थिइन् ।

दुई छोरी र आमाबाबु गरी ४ जनाको यो नेपाली परिवारको युनलङमा बसोबास रहेकाे छ । पीडित युवतीकी बुबा म्यानुअल कामदार हुन् भने आमा रेस्टुरेन्टमा काम गर्छिन् ।

युयुङ उपनाम गरेका कार चालक भने सकुशल रहेका छन् । चीनियाँ मूलका उनलाई खतरनाक तरिकाले सवारी साधन चलाएको आरोपमा प्रहरीले नियन्त्रणमा लिएको छ । चालकले ट्राफिक बत्तीको अवज्ञा गरेको आशंकामा अनुसन्धान अघि बढाइएको प्रहरीले जनाएको छ ।

प्रहरीले घटनास्थलका प्रत्यक्षदर्शीलाई सम्पर्कमा आउनसमेत आह्वान गरेको छ । जसका लागि प्रहरीले स्थानीय हटलाइन नम्बर ३६६१ ३८०० मा सम्पर्क गर्न सकिने बताइएको छ ।

हङकङको कानूनअनुसार गम्भीर शारीरिक हानी वा मृत्यु हुनेगरी सवारी साधन चलाएको अपराधमा दोषी ठहरिएमा ७ देखि १० वर्षसम्म कैद सजाँयसहित २ देखि ५ वर्षसम्म सवारी साधन चलाउन अयोग्य ठहरिन सक्नेछ । साथै, अपराधीलाई अधिकतम ५० हजार हङकङ डलरसम्म जरिवाना हुने कानूनी प्रावधान रहेकाे छ ।