काठमाडाैं, जेठ १ ।
काठमाडौं महानगरपालिकाको वनस्थलीबाट माइक्रो बस चोरी भएको छ ।

वागमती प्रदेश ०१-००२ ज ६७६६ नम्बरको इलेक्ट्रोनिक माइक्रो बस काठमाडौं महानगरपालिका-१६ वनस्थलीस्थित विश्वकर्मा बाबा वर्कशप तथा चार्जिङ सेन्टर भित्रको पार्किङबाट चोरी भएको काठमाडौं जिल्ला प्रहरी परिसरका प्रवक्ता एसपी अपिलराज बोहराले जानकारी दिएका छन् ।

बस बैशाख २९ गते बिहान करिब साढे ४ बजे चोरी भएको हो । प्रहरीले चोरीमा संलग्न व्यक्तिलाई धादिङबाट पक्राउ गरेको छ ।

स्याङ्जाको बिरुवा गाउँपालिका-१ घर भइ हाल काठमाडौंको वनस्थली बस्ने १९ वर्षीय सुदिप थापाले चोरेर धादिङ पुर्‍याएको र उनलाई सवारी साधनसहित जिल्ला प्रहरी कार्यालय धादिङ समेतको समन्वयमा पक्राउ गरिएकाे हाे ।

सुदिपलाई चोरीसम्बन्धी कसुरमा काठमाडौं जिल्ला अदालतबाट चार दिन म्याद लिएर थप अनुसन्धान अगाडि बढाएको प्रहरीले जनाएकाे छ ।