काठमाडौं, फागुन ६ ।
स्थानीय निकायको काम गएको चार दिनदेखि ठप्प हुँदै आएकोमा आजबाट पुनः सञ्चालन हुने भएको छ ।

संघीय मामिला तथा स्थानीय विकास मन्त्रालयका अधिकारी र स्थानीय निकायका कर्मचारी संघ, संगठनका प्रतिनिधिबीच कार्यदल गठन गरी माग सम्बोधन गर्न आवश्यक छलफल गर्नेलगायत सात बुँदे सहमतिपश्चात् आन्दोलनका सबै कार्यक्रम फिर्ता भएको हो । मन्त्रालय र आन्दोलनरत पक्षका प्रतिनिधिबीच १२ सदस्यीय कार्यदल गठन गरी आन्दोलनरत पक्षका माग सम्बोधन गर्न दुबै पक्ष सहमत भएको मन्त्रालयका सल्लाहकार माधव सापकोटाले जानकारी दिएका छन् ।

गएको चार दिनदेखि स्थानीय निकायका कर्मचारीहरूलाई निजामती र अन्य निकायमा काम गर्ने कर्मचारीसरह समान पदका लागि समान अवसर प्रदान गर्नुपर्ने र लामो समयदेखि कार्यरत अस्थायी, करार र ज्यालादारी कामदारलाई सेवामा निरन्तरताको अवसर दिनुपर्नेलगायत माग अगाडि सार्दै स्थानीय निकायका कर्मचारीहरू आन्दोलित हुँदै आएका थिए ।

गत बिहीबार एक घण्टा र शुक्रबार १० देखि अपराह्न १ बजेसम्म काम छाडेर हड्तालमा उत्रिएका कर्मचारीहरूले आइतबारबाट देशभरका पूरै स्थानीय निकायबाट कामकाज ठप्प पारेका हुन् ।