काठमाडौं, असार ४ ।
बार्सिलोनाका खेलाडी फरवार्डद्वय लिओनेल मेस्सी र लुइस सुआरेज हाल छुट्टि मनाउन स्पेनको इबिजामा रहेका छन् । बार्सिलोनाका पूर्व खेलाडी सेस फब्रिगास पनि छुट्टिमा मेस्सी र सुआरेजसँगै रमाउँदै छन् ।

आ–आफ्नो परिवारसँग इबिजाको बिचमा रमाउँदै गरेका खेलाडीहरू यसै महिनाको अन्त्यमा लिओनेल मेस्सीको विवाहमा सरिक हुँदैछन् । मेस्सीले प्रेमिका एन्टोनेल्ला रोक्कुज्जोसँग जुन ३० मा विवाह गर्ने भएका छन् । विवाह अघि छुट्टिमा मेस्सीसँग रोक्कुज्जो र उनीहरूको २ सन्तान पनि रहेका छन् ।

यसैक्रममा छुट्टी मनाइरहेका खेलाडीहरूले इबिजाको क्लब रेष्टुरेन्ट कबारेटनामक रेष्टुरेन्टमा खाएको खानाको बिल इन्टरनेटमा भाइरल भएको छ । कुल ३७ हजार ३ सय ३० युरो उठेको बिलमा ६ हजार ४ सय ७८ युरो कर जोडिएको छ ।

२७ पिज्जाको ६ सय २१ युरो, ७ बर्गरको १ सय १२ युरो, ४ फलफुल बास्केटको १ हजार युरो रहेको छ भने सबैभन्दा बढी ४१ ओटा स्याम्पेनको २४ हजार ६ सय युरो तिरेका छन् । उक्त खानाको बिल मेस्सी आफैंले तिरेका थिए ।

सुआरेज, मेस्सी र फब्रिगास निकै मिल्ने साथिहरू हुन् । बार्सिलोना छाडेपनि फब्रिगासको खेलाडीहरूसँग राम्रो सम्बन्ध रहँदै आएको छ । मेस्सीले आफ्नो विवाहमा क्लबका केहि पूर्वखेलाडीहरूलाई पनि निम्तो दिएका छन् ।