एजेन्सी, चैत २३ ।
पपुवा न्यू गिनीको न्यू ब्रिटेन क्षेत्रीय तटमा ७ दशमलव १ रेक्टर स्केलको शक्तिशाली भूकम्प गएको छ । युरोपेली-भूमध्यसागरीय भूकम्प विज्ञान केन्द्र (ईएमएससी)ले यसबारे जानकारी दिएको हो ।

भूकम्प शनिबार बिहान गएको थियो । यसको केन्द्रबिन्दु किम्बे शहरबाट १९४ किलोमिटर पूर्वमा रहेको अमेरिकी भूगर्भ सर्वेक्षण (यूएसजीएस)ले उल्लेख गरेको छ ।

ईएमएससीकाअनुसार भूकम्पको गहिराइ ४९ किलोमिटर रहेको छ । अमेरिकी सुनामी चेतावनी केन्द्रले पपुवा न्यू गिनीको तटीय क्षेत्रमा सुनामी लहर आउन सक्ने चेतावनी जारी गरेको छ । साथै, छिमेकी सोलोमन टापुहरूका लागि ३ मिटरसम्मको साना लहरहरूको चेतावनी पनि जारी गरिएको छ ।

हालसम्म क्षतिको विवरण प्राप्त भएको छैन । तर, किम्बे जस्ता नजिकैका क्षेत्रमा भूकम्पको धक्का महशुस गरिएको स्थानीय सञ्चारमाध्यमले जनाएका छन् । अधिकारीहरूले स्थिति नजिकबाट नियालिरहेको उल्लेख गर्दै थप जानकारी संकलन गरिरहेको जानकारी दिएका छन् ।