काठमाडौं, असार ६ ।
क्रोएसियाका कप्तान एवं रियल म्याड्रिडका स्टार मिडफिल्डर लुका मोड्रीचलाई अदालतमा बयान दिँदा झुटो बोलेको आरोपमा क्रोएसिया सरकारी वकिलको कार्यालयले छानबिन गर्दैछ । यदि उनले झुटो बोलेको प्रमाणित भएमा ६ महिना देखि ५ वर्षसम्म जेल सजायँ हुने नियम रहेको छ ।

क्रोएसिया फुटबल संघको पुर्व उपाध्यक्ष एवं डिनामो जाग्रेब क्लबका पुर्व सीइओ ड्राभ्को मामिचलाई लागेको कर छली र ठगिको मुद्दामा मोड्रीचले साक्षी बसेर झुटो बयान दिएको आरोप लागेको छ । मामिचलाई सन् २००८मा मोड्रीच जाग्रेबबाट टोटेनहम हट्स्पर जाँदा क्लबले पाउनुपर्ने रकम आफैंले राखेको आरोप पनि लागेको छ ।

जाग्रेबसँग मोड्रीचको अनुबन्धनमा खेलाडीको स्थानान्तरण रकम क्लब र खेलाडीले आधा बाँड्ने उल्लेख गरिएको थियो । तर मामिच सीइओ भएको बेलामा गरिएको उक्त अनुबन्धन शर्त मोड्रीच टोटेनहम जाने पक्का भएपछि मात्र गरिएको अभियोग लगाउने वकिलले दाबी गरेका छन् । वकिलका अनुसार उक्त शर्त पछि थपेर पुरानो मिति राख्ने काम भएको थियो ।

सुरुवाती बयानमा मोड्रीचले उक्त अनुबन्धन पछि भएको मानेपनि अदालतमा बयान दिँदा भने आफ्नो कुरा फेरेका थिए । उनले अदालतमा आफुले भ्रमित भएर प्रारम्भिक बयान दिएको बताएका थिए । यसै मुद्दालाई लिएर सरकरी वकिल कार्यालयले मोड्रीच माथि झुटो बोलेको आरोपमा छानबिन गर्न लागेको हो ।

यदि मोड्रीचलाई अदालतले दोषी ठहर्याएर जेल सजायँ दिएको खण्डमा क्रोएसियाको विश्वकप २०१८ मा छनौट हुने र रियल म्याड्रिडको ला लिगा र च्याम्पियन्स लिग रक्षा गर्ने लक्ष्यमा ठुलो धक्का लाग्नेछ ।