एजेन्सी, फागुन ७ ।
भारतको तमिलनाडु राज्यको विधान सभामा आज झडप र तोडफोड भएको छ । सोही झडपको क्रममा पनि विधान सभाको विशेष सत्रमा ध्वनी मतका आधारमा मुख्यमन्त्री पलनीसामीले विश्वासको मत जित्न सफल भएका छन् । उनले गत बिहीबार मात्र मुख्यमन्त्रीको सपथ लिएका थिए ।

विपक्षी कंग्रेस, डीएमके र पनीरसेल्बमको खेमाले विश्वासको मत गोप्य मतदानबाट हुनुपर्ने माग गरेका थिए । तर, सभामुखले यो माग अस्वीकार गरेपछि तोडफोड सुरु भएको हो । झडपका क्रममा सभामुखले आफ्नो सर्टसमेत च्यातिएको बताएका छन् । अराजक स्थितिकाबीच आफू अपमानित हुनु परेको उनको भनाई थियो ।

तर, डीएमकेका सांसद्हरूले भने सभामुख आफैँले सर्ट च्यातेको दाबी गरेका छन् । सभामुखको टेबलमा राखिएको माइकसमेत भाँचिएको बताइएको छ ।

विधान सभाको कारबाही स्थगित हुनुभन्दा पहिले सभामुखले डीएमकेका सदस्यहरूलाई सदनबाट बाहिर निकाल्न आदेश दिएका थिए । त्यसपछि सदनमा पुनः हङ्गामा सुरु भएको थियो ।