काठमाडाैं, चैत २० ।
यही चैत १५ गते शुक्रबार भएको घटनामा दुई जना होनहार युवाहरूको मृत्यु भएकोमा न्याम्ह नेवाःले सामूहिक विज्ञप्ति प्रकाशित गरी घटनाको सत्य तथ्य छानबिन र दोषीमाथि कडा कारबाहीको माग गरेको छ ।

विज्ञप्तिमा घटनाको सन्दर्भमा छानबिन गर्न तथा दोषीहरूलाई हदैसम्मको कारबाही गरी पीडितहरूलाई न्याय दिन माग गरिएको छ । यातायात व्यावसाय गरी सामान्य जीवन-यापन गरिरहेका कर्मशील युवा २९ वर्षीय सविन महर्जन र पत्रकारिता पेशामा क्रियाशील सुरेश रजकको समाचार संकलनका क्रममा अराजक जत्थाले लगाएको आगोमा परी जिउँदै जलाइएको घटनाको यथार्थ जानकारी दिनसमेत माग गरिएको छ ।

राजनीतिक परिवर्तनको नाममा हुने यस्ता हिंसात्मक र अराजक गतिविधिहरूको शिकार निर्दोष नेवाः समुदायले कतिञ्जेल भोग्नुपर्ने ? भन्दै नेवाः समुदायलाई बली चढ़ाए सत्ता र भत्ताको राजनीति गर्ने हर्कत स्वीकार्य नहुने चेतावनीसमेत विज्ञप्तीमार्फत् दिइएको छ ।

घटनाको समग्र पक्षहरूमा पारद‌र्शी अनुसन्धानसहित घटना घटाउने तथा घटना घटाउन उक्साउने सबै पक्षलाई कानूनी दायरामा ल्याउन र पीडितहरूलाई उचित क्षतिपूर्ति व्यवस्था गर्न विज्ञप्तिमार्फत् मागसमेत गरिएको छ ।