काठमाडौं, असार ८ ।
रुसमा जारी रहेको फिफा कनफेडेरेशन कप फुटबलअन्तर्गत गएराति भएको प्रतिस्पर्धात्मक खेलमा मेक्सिकोले जित हात पारेको छ ।

समूह ‘ए’ मा रहेको मेक्सिकोले न्यूजिल्याण्डलाई २–१ गोलले पराजित गरेको हो । मेक्सिकोलाई जिताउन राउज जिमेनेज र ओरिबे पेराल्ताले एक–एक गोल गरेका थिए ।

न्यूजिल्याण्डका लागि क्रिस वुडले एक मात्र गोल गरेका थिए । ४२ औँ मिनेटमा वुडले गोल गरेपछि न्यूजिल्याण्डले पहिलो हाफमा १ विरुद्ध शून्य गोलले अग्रता लिएका थिए । तर, उसले यो अग्रता दोश्रो हाफमा जोगाउन भने सकेन ।

जिमेनेजले ५४ औँ मिनेटमा मेक्सिकोका लागि बराबरी गोल फर्काएका थिए । ७२ औँ मिनेटमा पेराल्ताले गोल गरेपछि मेक्सिको २–१ गोलले विजयी हुन पुगेको हो । जितपछि समूहको शीर्ष स्थानमा रहेको मेक्सिकोको दुई खेलबाट चार अंक भएको छ ।

समान चार अंक नै जोडेको पोर्चुगल दोश्रो स्थानमा रहेको छ । पहिलो खेल जिते पनि दोश्रो खेलमा पोर्चुगलसँग पराजित भएको आयोजक रुस तीन अंकसहित तेश्रो स्थानमा पुगेको छ भने न्यूजिल्याण्डले अहिलेसम्म कुनै पनि अंक जोड्न सकेको छैन ।