काठमाडौं, फागुन ९ ।
नेप्से परिसूचकअन्तर्गत आज कारोबारको सुरुवातदेखि नै उतारचढाव भए तापनि बजारमा कारोबार रकम भने सुधार भएको छ ।

शेयर बजार आज ४ दशमलव २४ अंकले घटेर नेप्से परिसूचक १३६५ दशमलव ११ अंकमा झरेको छ । ‘क’ वर्गका कम्पनीहरूको कारोबार मापन गर्ने सेन्सेटिभ इण्डेक्स पनि शून्य दशमलव ८८ अंकले गिरावट आएसँगै २९७ दशमलव २८ अंकमा ओर्लिएको छ ।

शेयर बजारमा खरिद कर्ता र बिक्री कर्ताबीचको सम्बन्धमा सुधार आएपछि कारोबार बढेको छ भने ८१ करोड रुपैयाँ बराबरका १५ लाख कित्ता शेयर खरिद बिक्री भएको छ ।

सात समूहको कारोबार भएकोमा पाँच समूहले आज गुमाएका छन् भने दुई समूहका लगानी कर्ताहरूले कमाएका छन् । आज गुमाउनेमा बैंकिङ्ग समूह ४ दशमलव ३८, विकास बैंक १० दशमलव ७९, जलविद्युत ३ दशमलव ९८, फाइनान्स ५ दशमलव ५७ र अन्यमा ६ दशमलव ०७ अंकको गिरावट आएको छ । आज होटेल र बीमा समूहले कमाउन सफल भएका छन् । होटेल शून्य दशमलव २ र बीमा ३६ दशमलव १२ अंकले बढेको छ ।

आज सबैभन्दा बढी नेपाल लाइफको चार करोड २० लाख रुपैयाँको कारोबार भएको छ । आज सबैभन्दा बढी आइएलएफसीएम माइक्रो फाइनान्सका लगानीकर्ताले १० प्रतिशत कमाएको छ भने सबैभन्दा बढी भागर्भ विकास बैंकका शेयरधनीले करिब ६ प्रतिशतले गुमाउन पुगेको छ ।