एजेन्सी, चैत २० ।
भारतको उत्तर प्रदेशस्थित एउटा विद्यालयमा पानीको बोतल छोएको निहुँमा शिक्षकको क्रूरताले हद पार गरेको छ । शिक्षकले दलित विद्यार्थीलाई पानीको बोतल छोएको भन्दै अमानवीय तरिकाले कुटपिट गरेका छन् ।

भारतीय सञ्चारमाध्यमकाअनुसार घटना गत शनिबारको हो । नरेन्द्र प्रताप सिंह मेमोरियल हाई स्कूलमा १२ कक्षामा पढ्ने निशान्तले कक्षाको टेबलमा राखिएको पानीको बोतल हातमा लिएका थिए । त्यसपछि रिसले आगो भएका शिक्षक मंगल सिंह शाक्यले निशान्तलाई जातीय गाली दिँदै कुटपिट गरेका हुन् ।

उनले बोतल अछुत भएको भन्दै आक्रोश पोखेको बताइएको छ । उनको यातना यतिसम्म थियो कि कुटपिटबाट विद्यार्थीका दुई औँला भाँचिए । त्यो मात्रै नभएर यसबारे कसैलाई भनेमा भयानक परिणाम भोग्नुपर्ने धम्कीसमेत दिएको पीडित विद्यार्थीले जानकारी दिएका छन् ।

निशान्तले भनेका छन्, ‘उसले मलाई जातीय शब्द प्रयोग गरेर गाली गर्यो । बिदाको समयमा, उसले मलाई कोठामा थुनेर कुटपिट गर्यो । उसले मेरा दुई औँला पनि भाँचिदियो ‌’ निशान्तको परिवारले प्रहरी चौकीमा उजुरी गर्न खोजे पनि सुरुमा दर्ता भएन ।

त्यसपछि, उनीहरूले मंगलबार कलेक्टर कार्यालयमा गएर एसपीलाई भेटे । एसपीको आदेशमा शिक्षकविरुद्ध मुद्दा दर्ता भएको छ । एससी/एसटीसहित आठ गम्भीर धारामा मुद्दा चलाइएको छ । शिक्षक अहिले फरार रहेका छन् । प्रहरीले उनलाई चाँडै पक्राउ गर्ने जनाएको छ ।