एजेन्सी, पुस १६
ब्राजिलका लागि ग्रीसका राजदूत किरीआकोस अमरिदिसको हत्या उनकै श्रीमती फ्राँस्वाको योजनामा भएको प्रहरीले सार्वजनिक गरेको छ। श्रीमतीको योजनामा उनको प्रेमीले अमरिदिसलाई घरमै हत्या गरेको र हत्यामा तीन जना व्यक्ति संलग्न देखिएको ब्राजिलका स्थानीय प्रहरीले दाबी गरेका छन् ।

प्रहरीको दाबीअनुसार अमरिदिसकी श्रीमतीलाई स्थानीय अधिकृत सेर्गिओ मोरेरियाले हत्यामा सघाएका थिए। उनी फ्राँस्वाकी प्रेमीसमेत हुन्। तेश्राे व्यक्तिले शव कारमा राखेर बाहिर लगेर फ्लाइओभर मुनि जलाएको प्रहरीको दाबी छ। शव जलाउनका लागि ती व्यक्तिलाई फ्राँस्वाले २५ हजार अमेरिकी डलर दिएकोसमेत खुलासा भएको छ।

प्रहरीले अनुसन्धानका फ्राँस्वा र उनका प्रहरी प्रेमीलाई पक्राउ गरिसकेको छ। फ्राँस्वालाई पक्राउ गर्नुको आधार स्थानीय प्रहरीको बयान रहेको बताइएको छ। बयानमा उनले फ्राँस्वा आफ्नी प्रेमी रहेकी र उनकै निर्देशनमा अमरिदिसको हत्या गरेको खुलाएका छन्।

पाँच दिन अघि अमरिदिस हराएको भन्दै उनको श्रीमतीले प्रहरीलाई खबर गरेकी थिइन्। उनले कसैलाई जानकारी नदिई कार लिएर हिँडेको दाबी गरेकी थिइन् । दोश्राे दिन जलेको कारमा उनको शव फेला परेको थियो।

अनुसन्धानमा संलग्न प्रहरीले अमरिदिस बस्ने घरको सोफामा रगतको दाग फेला पारेका छन्। सो रगत राजदूतकै भएको निष्कर्ष निकाल्दै प्रहरीले घरमै उनको हत्या गरी शव कारमा राखी बाहिर लगेर जलाइको अनुमान गरेका छन्।

१५ वर्षदेखि वैवाहिक सम्बन्धमा रहेका अमरिदिस र फ्राँस्वाको १० वर्षका छोरा छन्। हत्या अभियोगमा अनुसन्धानका लागि ३० दिनको म्याद लिएर प्रहरीले फ्राँस्वालाई हिरासतमा राखेको छ।