काठमाडाैं, पुस १६
सत्तारुढ दल नेकपा माओवादी केन्द्रका नेता एवं पूर्वउपप्रधानमन्त्री टोपबहादुर रायमाझीले संशोधन विधेयक कुनै हालतमा पारित नहुने भन्दै त्यसलाई अविलम्ब फिर्ता लिनुपर्ने माग गरेका छन्र।

राजधानीमा अाज आयोजित एक साक्षात्कार कार्यक्रममा बाेल्दै उनले संशोधन विधेयक  कसैको पनि हितमा नरहेको दाबी गर्दै उनले भने, ‘यो संशोधन प्रस्तावले कसैको हित गर्दैन, न त यसले जनताको नै हित गर्छ, न त राष्ट्रको नै, र यो सीमांकन हेरफेरको विषय त झनै संघीयताको मर्म र भावना विपरीत छ।’

उनले यथास्थितिमा आफूले यो प्रस्तावको कुनै हालतमा समर्थन नगर्ने र आफ्नो अडान आज मात्रै नभएर भोलि पनि यो विधेयकको विरुद्धमा नै रहने दाबी गर्दै उनले भने ९० प्रतिशतले जारी गरेको संविधान अहिले आएर एमाले पनि यो विधेयकको विपक्षमा हुँदा कसरी दुई तिहाई पुग्छ भन्दै प्रश्न समेत गरे।

उनले भने, ‘एमालेले मात्रै होइन, हामी सरकारमा भएका पनि यो प्रस्तावको विपक्षमा छौं ।’ रायमाझीले आन्दोलनकारीहरूको माग पूरा गर्नुपर्छ भन्ने पक्षमा आफूहरू अझै पनि गम्भीर रहेको बताउँदै उनले भने, ‘आन्दोलनकारीहरूका मागहरू राष्ट्रिय सहमति जुटाएर सम्बोधन गर्नुपर्छ ।’ उनले अहिले सरकारले ल्याएको प्रदेशको सीमांकन हेरफेरको प्रस्तावले मधेशी मोर्चाको माग पूरा हुनै नसक्ने ठोकुवा गरे।