काठमाडौं, असार २४ ।
पाकिस्तानमा हुन गइरहेको मैत्रीपूर्ण खेल खेल्नका लागि ब्राजिलका महँगा र चर्चित खेलाडीहरू कराँचीमा पुगेका छन् ।

कराँची पुग्ने खेलाडीहरूमा ब्राजिलका पूर्वस्टार खेलाडी रोनाल्डिन्हो, रोबर्टो कार्लोसलगायत म्यानचेस्टर युनाइटेडका रायन गिग्स पाकिस्तानको कराँची पुगेका हुन् । उनीहरूलाई मैत्रीपूर्ण खेलका लागि महँगो रकमसमेत उपलब्ध गराएको छ । यी खेलाडीबाहेक निकोलस एनेल्का, रोबर्ट माइरेस, डेभिड जेम्स, जर्ज बोएटिङ, लुई बोआ मोर्टेलाई बोकेर पाकिस्तानी सेनाको विशेष विमान शनिबार बिहान कराँची पुगेका छन् ।

मैत्रीपूर्ण खेलको आयोजना लेजर लिग्स एण्ड वल्र्ड ग्रुपले गराएको हो । पाकिस्तानमा फुटबलको स्तर उकास्न मैत्रीपूर्ण खेलको आयोजना गरिएको आयोजकले जनाएको छ । न्यूज इन्टरनेशनल पत्रिकामा उल्लेख गरिएअनुसार रोनाल्डिन्होलाई यसका लागि लेजर लिगले ६ करोड २० लाख रुपैयाँ उपलब्ध गराएको छ । खेल हेर्नका लागि टिकट मूल्य दुई हजारदेखि ३० हजारसम्म तोकिएको छ ।