काठमाडौं, असार २५ ।
नेपालसँगको मैत्रीपूर्ण खेलका लागि बंगलादेशको युवा टोली आज काठमाडौं आउँदैछ । एएफसी यु २३ च्याम्पियनसिपको छनोट चरणको तयारीमा रहेका नेपाल र बंगलादेशले मंगलबार सातदोबाटोमा रहेको मैदानमा मैत्रीपूर्ण खेल खेल्नेछन् ।

संयुक्त अरब इमिरेट्समा (युएई) हुने यु २३ च्याम्पियनसिप छनोटको समूह ‘डी’ मा रहेको नेपालले पहिलो खेल असार ३१ गते खेल्नेछ ।

आयोजक युएईसँगै नेपालको समूहमा उज्बेकिस्तान र लेबनान रहेका छन् । नेपालले पहिलो खेलमा आयोजक राष्ट्र युएईसँग खेल्दैछ भने साउन २ गते हुने दोश्रो खेलमा उज्बेकिस्तानको सामना गर्नेछ । समूहको अन्तिम खेलमा नेपालले साउन ४ गते लेबनानको सामना गर्नेछ ।

बंगलादेश समूह ‘ई’मा जोर्डन, ताजिकिस्तान र प्यालेस्टाइनसँग रहेको छ । बंगलादेशले पहिलो खेल साउन ४ गते खेल्नेछ । बंगलादेशको सबै खेल प्यालेस्टाइनमा खेलिनेछ । नेपाली टोली असार २९ गते युएईतर्फ प्रस्थान गर्नेछ । टोलीका प्रशिक्षकमा राजु काजी शाक्य, सहायक प्रशिक्षक प्रकास अर्याल र गोलरक्षक प्रशिक्षकमा मृगेन्द्र मिश्र रहेका छन् ।