सर्लाही, फागुन १३ ।
सर्लाहीको हरिवन नगरपालिका–१० सुखेपोखरीमा रहेको द ब्रदर्श पेट्रोल पम्पमा आगलागी हुँदा चार जना घाइते भएका छन् । आगोले जलेर घाइते भएका चारै जनाको अवस्था गम्भीर रहेको सर्लाही प्रहरीले जनाएको छ ।

गएराति पौने ११ बजे विद्युत सर्ट भएर पेट्रोल पम्पमा आगलागी हुँदा सञ्चालक हरिवन नगरपालिका–९ का ३७ वर्षीय नारायण उप्रेती, कामदारहरू काभ्रे पात्ले–३ का २३ वर्षीय सुदन बराल, बारा अमलेखगञ्जका २२ वर्षीय निरज अन्सारी र सर्लाही कर्मैया–४ वागमतीका २२ वर्षीय प्रमोद साह घाइते भएका छन् ।

घाइते सबैको वीरगञ्जमा उपचार भइरहेको हरिवनका प्रहरी निरीक्षक उदयभान द्विवेदीले जानकारी दिए । आगो निभाउन खोज्दा चारै जना जलेर घाइते हुन पुगेको प्रहरी निरीक्षक द्विवेदीले बताए । आगलागीबाट पेट्रोल पम्पको काउण्टरमा क्षति पुगेको छ । आगलागी प्रहरी र स्थानीयबासी मिलेर नियन्त्रणमा लिएका थिए ।