एजेन्सी, असार २६ ।
भनिन्छ, काल नअाएसम्म जस्ताे सुकै दुर्घटनामा परे पनि मर्दैन भने जस्तै एउटा घटनाले अहिले सामाजिक सञ्जालमा पुनः भाइरल भएकाे छ । भाग्यमा बाँच्न लेखिएको छ भने कुनै कुराले पनि त्यसलाई रोक्न सक्दैन । त्यस्तै एउटा घटना ब्राजिलको कर्टिबबाट बाहिर आएको छ । सो ठाउँका एक जना व्यक्तिले २४ घण्टापछि जंगलमा गाडिएको नवजात शिशुलाई जीवितै उद्दार गरेका छन् ।

घटना सन् २००६ को हो, यस घटनाका तस्वीरहरू ११ वर्षपछि हाल सामाजिक सञ्जालहरूमा विश्वव्यापी रूपमा भाइरल भइरहेका छन् । समाचारकाअनुसार कर्टिबबासी एक महिलाले लुसिण्डा फेरिरा गुइमारेस नाम गरेकी उनकी छिमेकी महिलालाई बिहानै कतै जाँदै गरेको देखिन् ।

गुइमारेस त्यस समय गर्भवती थिइन् । तर, बेलुकी जब उनी घर आइन् तब उनको कपडा रगतले लत्पतिएको थियो र शरीरको आकार पनि साबिकको तुलनामा सानो थियो । यति देखेपछि उक्त महिलालाई गुइमारेसप्रति शंका उत्पन्न भयो र उनले आसपासका क्षेत्रहरूमा खोजतलास सुरु गरिन् ।

खोजतलासकै क्रममा उनले जंगलको एउटा रुखको मुनि झिँगाहरू भनभनाई रहेको देखिन् । जब उनले त्यसको नजिक गएर हेरिन् त्यहाँ एउटा शिशुको टाउको थियो । त्यसपश्चात ती महिलाले तुरुन्तै प्रहरीलाई जानकारी दिइन् । त्यस समय सबैलाई शिशु जिउँदो छैन भन्ने लागेको थियो तर, जब शिशुलाई खाडलबाट बाहिर निकालियो तब त्यो रुन थाल्यो । त्यसपश्चात त्यसलाई सरसफाई गरेर र उसको बुबाको हातमा प्रहरीले सुम्पियो र आमालाई समातियो ।

वास्तवमा ती महिला गुइमारेसले नजिकैको जंगलमा उक्त नवजात शिशुलाई जन्म दिएकी थिइन् र त्यसलाई जिउँदै पुरेकी थिइन् । यसरी जन्मेको २४ घण्टासम्म माटो मुनि गाडिए पनि शिशुको स्वास्थ्यमा कुनै खराबी नआई बाँच्नु सबैको आश्चर्यको विषय बनेको थियो । यसका बारेमा प्रहरी तथा चिकित्सकहरू तीन कारण बताएका थिए ।

प्रहरीले त्यस समय पानी परेको कारणले शिशुको शिरको माटो बगाएको हुँदा उसको टाउको बाहिर निक्लेर उसलाई सास फेर्न सम्भव भएको थियो । दोश्रोमा चिकित्सक कारण देखाउँदै भने शिशुको शरीरमा जेलिएका सालनालले उसलाई रगतको कमी हुन दिएन र उक्त सालनालकै कारणले शिशुको शरीरमा २४ घण्टा नै पोषण तत्वको कमी हुन पाएन । हाल उक्त नवजात शिशु ११ वर्षको भएको छ र उनको स्वाथ्य अवस्था पनि एकदमै राम्रो छ ।