काठमाडौं, फागुन १३ ।
स्वास्थ्य मन्त्री गगनकुमार थापाले सरकारले तोकेको मापदण्डअनुसार गुणस्तरीय स्वास्थ्य सेवा प्रदान गर्न सम्बन्धित क्षेत्रमा आबद्ध सबैमा आग्रह गरेका छन् । उनले सरकारी र निजी क्षेत्रले नागरिकलाई सहज रूपमा सेवा प्रदान गर्नुपर्ने बताएका हुन् ।

राजधानीको सोह्रखुट्टेमा पर्यटक लक्षित २५ शैय्याको एरा हेल्थ सेन्टरको आज उद्घाटन गर्दै उनले विदेशी पर्यटक लक्षित अस्पतालमा महँगो लगानी मात्र नभई सेवा र सुविधा अनि गुणस्तरीय र भरपर्दो हुनुपर्ने बताए । मन्त्री थापाले भने, ‘नेपाल सरकारले तोकेको मापदण्ड पूरा गरेर सञ्चालनमा आएको यस सेन्टरले स्वदेशी तथा विदेशी पर्यटकको गुणस्तरीय स्वास्थ्य उपचारमा महत्वपूर्ण भूमिका खेल्नेछ ।’

सेन्टरले स्वदेशी तथा विदेशी बिरामीको उपचारका लागि अन्तर्राष्ट्रिय मापदण्डअनुसारका उद्दार, परामर्श एवं उपचार सेवा र सुविधाको भरपर्दो व्यवस्था मिलाएको छ । यस सेन्टरबाट स्वदेशी तथा विदेशी पर्यटकहरूले आवश्यकताअनुसार मेडिकल इमर्जेन्सिजको लाभ लिन सक्ने छन् ।

सेन्टरका अध्यक्ष एवं मेडिकल डाइरेक्टर डा. गिर्वाणराज तिमिल्सिनाले भने, ‘हाम्रो अस्पताल नेपालभरीकै एउटा उत्कृष्ट ट्राभलर सेन्टर हो । कुनै पनि विदेशी नेपाल आउँदाको समय बिरामी भएको बेला उपचार गर्न पाएनौँ भन्ने गुनासो नहोस् भन्ने हाम्रो मिशन हो । भविष्यमा यसलाई एशियाकै उत्कृष्ट ट्राभलर सेन्टर बनाउने उद्देश्यका साथ अघि बढेका छौँ ।’