काठमाडौं, असार २७ ।
संयुक्त अरब इमिरेट्स (युएई) मा हुने एएफसी २३ वर्षमुनि (यू–२३) च्याम्पियनशीप छनौटको तयारीमा रहेको नेपाली टोलीले आज बङ्गलादेशको २३ वर्षमुनिको राष्ट्रिय टोलीसँग मैत्रीपूर्ण फुटबल खेल खेल्दैछ ।

ललितपुरको सातदोबाटोस्थित अखिल नेपाल फुटबल सङ्घ (एन्फा)को खेल मैदानमा हुने उक्त खेलको सम्पूर्ण तयारी पूरा भएको आयोजक एन्फाले जनाएको छ । यू–२३ का मुख्य प्रशिक्षक राजुकाजी शाक्यले मैत्रीपूर्ण खेलका लागि आफ्नो टोली तयारी अवस्थामा रहेको छ भन्दै एशियन कप छनौट खेलका लागि मैत्रीपूर्ण खेलले सहयोग गर्ने बताएका छन् । त्यस्तै कप्तान बिमल घर्तीमगरले १६ वर्षमुनि र १९ वर्षमुनि टोलीमा समावेश खेलाडी सहभागी भएकाले पनि तयारी राम्रो रहेको बताए ।

बङ्गलादेशका अष्ट्रेलियाली कोच आन्द्रे ओर्डले नेपालविरुद्धको खेल कठिनका साथै प्रतिस्पर्धात्मक हुने बताएका छन् । सोही राष्ट्रका कप्तान सोहिल रानाले आफ्नो टोलीले सकेसम्म राम्रो खेल प्रदर्शन गर्ने बताउँदै आजको खेल जितेमा आत्मविश्वास बढ्ने विश्वास व्यक्त गरे ।

बङ्गलादेशविरुद्धको खेल र युएईमा हुने छनौट प्रतियोगिताका लागि मुख्य प्रशिक्षक शाक्यले आइतबार घर्तीमगरको कप्तानीमा २३ सदस्यीय अन्तिम टोली घोषणा गरेका थिए ।