काठमाडौं, असार २९ ।
एएफसी यू–२३ च्याम्पियनसिपको छनोट चरणको खेलहरू खेल्न नेपाल यू–२३ राष्ट्रिय फुटबल टोली आज युएई प्रस्थान गरेको छ । अखिल नेपाल फुटबल संघ (एन्फा) ले टोलीलाई बुधबार नै बिदाई गरेका थिए ।

टोली त्रिभुवन विमानस्थलबाट दुबईका लागि बिहान ८ः१५ बजे नै उडेको जनाएको छ । शनिबार हुने पहिलो खेलमा नेपाली टोलीले नेपाली समयानुसार रातको ८ः१० बजे आयोजक युएईको सामना गर्दैछ ।

दोश्रो खेलमा सोमबार त्यसै समयमा उज्बेकिस्तान र नेपालले खेल्ने छ । अन्तिम खेल भने लेबनानसँग रातको ११ बजे बिहीबार खेलिनेछ ।
नेपालको समूहको सम्पूर्ण खेल अल आइन सहरको ताहनोन मोहमद बिन रंगशालामा हुनेछ ।

टोलीमा रहने २३ सदस्यीय टोलीको यसअघिनै घोषणा भइसकेको छ । विमल घर्ती मगर कप्तान रहेका टोलीका मुख्य प्रशिक्षकमा राजु काजी शाक्य रहेका छन् ।