काठमाडौं, फागुन १५ ।
चलचित्र ‘लुट–२’ रिलिज हुनुभन्दा अगाडि नै सर्वाधिक चर्चा कमाउन सफल भएसँगै अहिले नेपाली सिने बजारमा समेत राम्रो आम्दानी गर्न सफल भएको छ ।

उक्त चलचित्र फागुन १३ गते शुक्रबारदेखि एकसाथ राजधानीलगायत बाहिरका मुख्य शहरहरूमा प्रदर्शन गरेको चलचित्रले सर्वाधिक चर्चा कमाएसँगै राम्रो व्यापार पनि गरिरहेको छ । अहिलेसम्म सो चलचित्रले तीन दिनभित्रमा तीन करोड रुपैयाँभन्दा माथिको आम्दानी गरिसकेको छ ।

चलचित्रमा समावेश गरिएको चर्चित गीत ‘ठमेल बजार’ बोलको गीतले यूट्युबमा एक करोडभन्दा बढी भ्यूअर्स पुगिसकेको छ । ट्रेलर र गीतबाट राम्रो प्रतिक्रिया पाएको चलचित्रले अहिलेसम्मका सबै रेकर्ड तोड्न सक्ने चलचित्रकर्मीहरूको अनुमान रहेको छ ।

यसअघि, श्रीकृष्ण श्रेष्ठ र श्वेता खड्काद्वारा निर्मित चलचित्र ‘कोहिनुर’ले १० करोडभन्दा माथिको व्यापार गरेर राखेको रेकर्डलाई दिपकराज गिरी र दीपा श्री निरौलाद्वारा निर्मित ‘छक्का पञ्जा’ले १६ करोडभन्दा माथिको व्यापार गरेर नयाँ रेकर्ड बनाएका थिए ।

केही वर्ष अघिको सुपरहिट फिल्म ‘लुट’ को सिक्वेल ‘लुट–२’ लाई पनि निश्चल बस्नेतले निर्देशन गरेका हुन् । चलचित्रलाई माधव वाग्ले, नरेन्द्र महर्जन र निश्चल बस्नेतले निर्माण गरेका हुन् ।

चलचित्रमा दयाहाङ राई, सौगात मल्ल, ऋचा शर्मा, कर्मा, विपिन कार्की, सुशिलराज पाण्डेलगायतका अभिनय रहेका छन् । चलचित्रमा पुरषोत्तम प्रधानको छायाँकन, सुरेन्द्र पौडेलको सम्पादन रहेको छ ।

सफल चलचित्र ‘लुट’ को सिक्वेल ‘लुट–२’ को कथा लेखन सम्झदै निश्चलले सञ्चारमाध्यमहरूसँग भनेका छन, ‘भूकम्प र नाकाबन्दीले चलचित्रको कथा जन्माएको हो ।’

‘भूकम्प र नाकाबन्दी पछि नै हाक्कु काले जस्ता पात्रहरू बढी सक्रिय हुने र सोही माहोलमा चलचित्रको कथा जन्मिएको हो ।’ उनले भने ।

अस्थिर राजनीतिक अवस्था, मौलाउँदो कालोबजारी र त्यसको परिणाम नै ‘लुट–२’मा प्रष्ट्याइएको छ । नाकाबन्दीको मौका छोपेर गरिएको कालो धन्दा चलचित्रमार्फत उतार्दै छर्लङ्ग पार्न निर्देशक बस्नेत सफल देखिएका छन् ।