काठमाडौं, फागुन १६ ।
प्रधानमन्त्री पुष्पकमल दाहालले आफ्नो सपनामा दलित समुदायको साथ रहेको बताएका छन् । विश्व दलित संगठनका प्रतिनिधिहरूसँग आज भेट गर्दै उनले भने, ‘दलित समुदाय राज्यबाट सबै हिसाबले उत्पीडनमा पारिएको समुदाय हो । राजतन्त्र र एकात्मक सत्ताले दलितहरूलाई विभेद् गर्‍यो, हामीले त्यसकाविरुद्ध संघर्ष गर्यौं । सबै जाति, क्षेत्र, वर्ग, लिङ्ग र सीमान्तकृत समुदायको अधिकारका पक्षमा दलितहरू खुलेर लागे । संघीय लोकतान्त्रिक गणतन्त्र र सबैको समान अधिकार मेरो सपना थियो, मेरो सपनामा दलितहरूको राम्रो साथ रह्यो ।’

विश्वव्यापी रूपमै संगठित भएर दलित अधिकारको पक्षमा आवाज उठाउनु स्वागतयोग्य रहेको भन्दै प्रधानमन्त्री दाहालले नेपाल सरकारले दलितहरूको मुद्दालाई संयुक्त राष्ट्र संघमा प्रभावकारी रूपमा राख्ने आश्वासनसमेत दिएका छन् ।

भेटमा दलित अगुवाहरूले सीमान्तकृत समुदाय र दलितहरूको पक्षमा प्रधानमन्त्री दाहालले व्यक्तिगत र संस्थागत रूपमा गरेको संघर्ष र संविधानमा लिपिबद्ध अधिकारबारे आफूहरू अवगत रहेको जानकारी गराउँदै दलितका मुद्दाहरूलाई संयुक्त राष्ट्र संघसम्म लगेर नीतिगत परिमार्जनमा सहयोगका लागि आग्रह गरेका थिए ।