काठमाडौं, श्रावण ६ ।
आईसीसी यू–१९ विश्वकप क्रिकेट छनौट चरणअन्तर्गत एशिया क्षेत्रको छनौटको चौथो खेलमा नेपालले आज घरेलु टोली सिङ्गापुरलाई २२ रनले पराजित गर्दै जित हात पारेको छ ।

सिङ्गापुरस्थित बालेस्टीर रोडस्थित इण्डियन एशोसिएशन ग्राउण्डमा नेपालले दिएको एक सय ६९ रनको लक्ष्य पछ्याएको सिङ्गापुर ४६ ओभर ५ बलमा एक सय ४६ रनमा अलआउट भयो । यसअघि टस जितेर पहिले ब्याटिङ गरेको नेपालले ४६ दशमलव ५ ओभरमा अलआउट हुँदै एक सय ६९ रन बनायो ।

नेपालको सुरुवात खासै राम्रो हुन भने सकेन । २० रन जोड्दा पहिलो विकेटका रूपमा अनिल साहलाई व्यक्तिगत ७ गुमाएको नेपालले थप १२ रन जोड्दा प्रनिथ थापामगर ८ रन जोडेर आउट भए । आशिफ शेख पनि ७ रनमै आउट भए ।

चौथो नम्बर ब्याटिङमा आएका दिपेन्द्र सिंह ऐरी र सन्दिप सुनारले ३५ रनको साझेदारी गरे सन्दिप २६ रनमा आउट भए । लगातार ३ खेलमा चल्न नसकेका उनले आज सिङ्गापुरविरुद्ध भने ५५ बलमा २ चौका र १ छक्का हानेका थिए । पाँचौँ विकेटका लागि दिपेन्द्र र रोहितकुमारले ४१ रनको साझेदारी गरेका थिए ।

रोहित १५ रनमा आउट भए । पवन सरार्फ मात्र २ रनमा आउट भए । सातौँ विकेटका लागि प्रकाश केसीसँग १६ रनको साझेदारी गरेका ऐरी अर्धशतक बनाएर बाहिरिएका थिए । ८३ बलको सामना गरेका उनले २ चौका र २ छक्काको मद्दतमा ५४ रन बनाए । थप २४ रन जोड्दा नेपाल अलआउट भयो । प्रकाशले २३ रन बनाए भने सन्दिप लामिछानेले ५ र ललित राजवंशीले १ रन बनाए । किशोर महतो १ रनमा नटआउट रहे । सिङ्गापुरका बीबी विक्रमले ३ विकेट लिँदा आहान गोपीनाथ आचार र आर्यमन सुनिलले २–२ विकेट लिएका थिए ।