काठमाडौं, श्रावण ७ ।
नेपाली राष्ट्रिय फुटबल टोली प्रशिक्षण र मैत्रीपूर्ण खेलका लागि जापान भ्रमणमा जाने भएको छ ।

नेपाली टोली यहीँ श्रावण २५ गते १० दिनका लागि जापान जान लागेको अखिल नेपाल फुटबल संघ (एन्फा)ले जनाएको हो ।

एशियन कप छनौटअन्तर्गत आगामी भाद्र २० गते ताजकिस्तानविरुद्ध हुने खेलको तयारीका लागि टोलीले जापानमा अभ्यास खेल खेल्नेछ ।

ताजकिस्तानविरुद्धको खेलका लागि प्रमुख प्रशिक्षक ग्योतोकु कोजीले गत साताबाट टोलीको प्रशिक्षण सुरु गराइसकेका छन् ।

एशियन कप छनौटको पहिलो खेलमा फिलिपिन्ससँग उसकै मैदानमा ४–१ गोलले हारेको नेपालले घरेलु मैदानमा भएको दोश्रो खेलमा यमनसँग गोलरहित बराबरी खेलेको थियो ।