काठमाडौं, श्रावण ९ ।
नेपालले आईसीसी यू–१९ विश्वकपको एसियाली छनोट खेलमा आज मलेसियालाई ५ विकेटले हराएको छ । सिंगापुरमा केहिबेर अघि सम्पन्न भएको खेलमा ९० रनको लक्ष्य पछ्याएको नेपालले २२.२ ओभरमा ५ विकेट गुमाउँदै ९२ रन बनाउँदै पाँचौ खेलमा चौथो जित दर्ता गराएको हो ।

पहिलो विकेटका लागि सन्दीप सुनार र अनिल शाहले ३० रनको साझेदारी गरेपनि त्यसपछि नेपालको इनिङ केही लडखडाएको थियो ।

ब्याटिङमा राम्रो प्रदर्शन गर्न नसकेको युवा टोलीले सोमबारको खेलमा पनि ९० रन लक्ष्यका पुरा गर्न ५ विकेट खर्चनु परेको थियो । दीपेन्द्र सिंह ऐरी र रोहित कुमार पौडेलले छैटौं विकेटका लागि अविजित ५२ रनको साझेदारी गरेपछि नेपालको जित सहज बनेको थियो । रोहित ३४ र दीपेन्द्र १९ रनमा अविजित रहे ।

सन्दीपले १५, अनिले १२ रन बनाए । प्रनित थापा ८ रनमा आउट भए भने अदिल खान र प्रकाश केसीले खाता खोल्न सकेनन् । मलेसियाका विरान्दीप सिंहले ३ र हाफिजुद्दिनले २ विकेट लिएका थिए ।

त्यसअघि टस जितेर फिल्डिङ रोजेको नेपालका स्पिनर चम्किएपछि मलेसिया ३५.१ ओभरमा ८९ रन जोड्दै अलआउटभएको थियो ।

खेलको दोश्रो ओभरमै ओपनर सफिउल्ला मलिकलाई शुन्यमा गुमाएको मलेसियाको लागि दोश्रो विकेटका लागि कप्तान विरानदिप सिंह र साएद अजिज मुबारकले ५८ रनको साझेदारी गरे । नेपालका कप्तान सन्दिप लामिछानेले आफ्नो पहिलो ओभरमै ४६ रनमा खेलिरहेका मुबारकलाई कट बिहाईन्ड गराएका थिए । ६६ बल खेलेका मुबारकले ७ चौका र १ छक्का प्रहार गरे । सन्दिपले आफ्नो दोश्रो ओभरमा कप्तान विरानदिपको पनि विकेट लिँदै मलेसियालाई थप संकटमा पारेका थिए ।

त्यसपछि नियमित विकेट गुमाएको मलेसियाको लागि कसैले उल्लेख्य रन जोड्न सकेनन् । मलेसियाका ४ ब्याट्सम्यान खाता नखोली पेभेलियन फर्केका थिए । नेपालका लागि कप्तान सन्दिप लामिछानेले ७ विकेट लिएका थिए भने साहब आलमले २ विकेट लिए । प्रतियोगितामा पहिलो खेल खेलिरहेका रिजन ढकालले पनि १ विकेट लिन सफल भए ।

न्युजिल्याण्डमा हुने आईसीसी यू–१९ विश्वकपका लागि एसियाली छनौटमा चार टिमले एक अर्काबिरुद्ध दुई खेल खेल्नेछन् ।

अफगानिस्तानसँगको अन्तिम खेल बाँकी रहँदा नेपाल ८ अंकसहित दोस्रो स्थानमा छ । अफगानिस्तान प्रतियोगिताको एकमात्र अविजित टोली हो र उसको १० अंक छ ।

नेपालले छैटौं तथा अन्तिम खेल अफगानिस्तानसँग खेल्नेछ ।