काठमाडौं, फागुन १६ ।
उपराष्ट्रपति नन्दबहादुर पुनको स्वास्थ्य अवस्थाबारे जानकारी लिन प्रधानमन्त्री पुष्पकमल दाहाल आज काठमाडौंस्थित नर्भिक अस्पताल पुगेका छन् ।

विगत चार दिनदेखि रिंगटा लाग्ने, वान्ता आउने, ज्वरो आउने समस्या रहेको र निवासमै उपचार गर्दा समस्या कम नभएपछि आइतबार राति उपराष्ट्रपति पुनलाई थप उपचारका लागि नर्भिक अस्पतालमा भर्ना गरिएको हो ।

प्रधानमन्त्री दाहाल आज अस्पताल पुगेर उनको स्वास्थ्य अवस्थाबारे चासो लिनुभएको उपराष्ट्रपतिका प्रेस संयोजक मनोज घर्तीले जानकारी दिए ।

उपराष्ट्रपति पुनको उपचारमा डा. मधु घिमिरे र डा. शिवजीविक्रम सिलवाल संलग्न रहेका छन् । चिकित्सकले उनको शरीरमा सोडियम र पानीको मात्रासमेत कम देखिएको बताउनुभएको प्रेस संयोजक घर्तीले बताए ।

प्रधानमन्त्री दाहालले उपराष्ट्रपति पुनको स्वास्थ्य अवस्थाबारे जानकारी लिनुका साथै स्वास्थ्य लाभको कामना गरेका छन् । यसैगरी, उपप्रधानमन्त्री तथा अर्थमन्त्री कृष्णबहादुर महरा पनि अस्पताल पुगेर उपराष्ट्रपतिको स्वास्थ्य अवस्था बारे जानकारी लिँदै शीघ्र स्वास्थ्य लाभको कामना गरेका छन् ।

चिकित्सककाअनुसार हाल उपराष्ट्रपतिको स्वास्थ्यमा क्रमिक सुधार भइरहेको जनाएका छन् ।