काठमाडौं, श्रावण १६ ।
नेपाल टेलिकमले आजबाट आफ्ना विभिन्न सेवामा ग्राहकलाई विशेष छुट दिएको छ । उसले जिएसएम/सिडिएमए तथा एडिएसएल/एफटिटिएच सेवाका ग्राहकका लागि ‘प्रमोसनल अफर’ उपलब्ध गराएको हो ।

अब विदेशबाट आएको कल उठाउँदा पनि बोनस प्राप्त गर्न सकिने छ । यो अफर आगामी ९० दिनसम्म उपलब्ध गराइने टेलिकमका प्रवक्ता प्रतिभा वैद्यले जानकारी दिए ।

यो अफरअन्तर्गतको सेवा पुराना ग्राहकलाई समेत उपलब्ध हुनेछ । अब एक एमबिपिएससम्म गतिको एडिएसएल इन्टरनेट करसहित मासिक रु.एक हजारमा उपलब्ध हुनेछ । पहिला मासिक एक हजार १७ मा २५६ केबिपिएस गतिको एडिएसएल उपलब्ध थियो ।

त्यसैगरी भोल्युम बेस्ड एडिएसएलको मूल्य पनि घटाइएको छ । पहिला २१ जिबी डाटाका लागि रु.एक हजार नौ सय ८० शुल्क लिइएकोमा अब १५ जिबी डाटा रु.तीन सय मै उपलब्ध हुने टेलिकमद्वारा जारी विज्ञप्तिमा उल्लेख छ ।

यस्तै, २५ जिबी डाटाको रु. पाँच सय र ४० जिबीको डाटाको मूल्य रु.सात सय मात्र तोकिएको छ । यी डाटाको गति एक एमबिपिएससम्म हुनेछ ।

दर्ता शुल्क पनि घटाएको टेलिकमले पहिले दर्ता शुल्क करबाहेक रु.पाँच सय भएकोमा अब भोल्युम बेस्ड डाटाका लागि करबाहेक रु.तीन सय र अनलिमिटेड डाटाका लागि रु.दुई सयमात्र दर्ता शुल्क तोकिएको टेलिकमले जनाएको छ ।

यस्तै, अब पहिलेकै मूल्यमा पहिलेभन्दा डबल भोल्युमको एफटिटिएच सेवा प्राप्त गर्न सकिने छ । सोअनुरूप दश एमबिपिएस गतिको एफटिटिएच प्याकेजअन्तर्गत तीन महिनाका लागि दुई सय ४० जिबी, छ महिनाका लागि पाँच सय जिबी र १२ महिनाका लागि एक हजार दूई सय जिबी डाटा पहिलेकै मूल्यमा प्रयोग गर्न सकिने छ ।

त्यसैगरी एक सय एमबिपिएस गतिको प्याकेजअन्तर्गत १२ महिनाका लागि एक हजार दुई सय जिबी डाटा प्रयोग गर्न सकिने छ । साथै विदेशबाट आएको कल उठाउँदा पनि अब बोनस प्राप्त गर्न सकिने छ ।

जिएसएम/सिडिएमए प्रिपेड र पोस्टपेडका ग्राहकले एक सातामा सात मिनेट वा त्योभन्दा बढी कल रिसिभ गर्दा टेलिकमको नेटवर्कभित्र सात मिनेट भ्वाइस कल गर्न र सातवटा एसएमएस निःशुल्क पठाउन सक्ने विज्ञप्तिमा उल्लेख छ ।