एजेन्सी, फागुन १८ ।
विश्वको शक्तिशालि राष्ट्र बन्ने होडमा अघि रहेको चीनले जल, स्थल र हवाई सुरक्षाका लागि निकै महत्वाकांक्षी योजना कार्यान्वयनमा ल्याउन थालेको छ ।

सैन्य शक्तिलाई बलियो बनाउने उद्देश्यले चीनले विगतका दिनहरूमा निकै ठूलो रकम खर्च गर्दै आएको छ । आधुनिक हतियार बनाउनेदेखि लिएर सैन्य बेस बनाउने काममा चीनले धेरै लगानी गर्दै आएको छ । विश्वका ठूल ठूला देशहरूलाई थाहा नै नदिइ चीनले सैन्य अभियान आधुनिकीकरण गर्नेदेखि लिएर सामरिक महत्वका क्षेत्रमा आन्तरिक तयारी गर्दै आएको छ ।

यसैगरी चीनले समुद्रमुनीसमेत आफ्नो सेना तैनाथ गर्ने महत्वाकांक्षी योजना अघि सारेको छ । त्यस योजनाअन्तर्गत समुद्रमुनी दश हजार फिटको गहिराईमा चीनले विशेष ‘प्लेटफर्म’ निर्माण गर्ने जनाएको छ ।

यो प्लेटफर्मबाट चीनले मलेसिया, फिलिपिन्स, भियतनाम लगायतका मुलुकमाथि निगरानी गर्नसक्ने योजना छ । यो प्लेटफर्मकै सहयोगबाट चीनले सामुद्रिक खोज तथा अनुसन्धानका कामलाई अघि बढाइने विश्वास लिएको छ ।

चाइनिज एकेडेमी अफ साइन्सेज (सीएएस) का शिक्षाविद् वाङ्ग पिनशियानको भनाई ‘दक्षिण चीन र पूर्वी चीन सागरमा दीर्घकालिन निगरानी गर्ने उद्देश्यले बनाइने प्लेटफर्म निर्माणमा संघाइको टोंगजी विश्वविद्यालय र इन्स्टिच्यूट अफ एकोस्टिक्सको सहयोग लिइने छ ।’
सांघाइमा आयोजना गरिएको एक वैज्ञानिक सम्मेलनमा उनले भनेका छन्, ‘प्लेटफर्म निर्माणबाट अन्तर्राष्ट्रय स्पर्धामा चीन सक्रिय रूपमा सामेल छ भन्ने कुरा देखाउनु छ ।’

इन्स्टिच्यूट अफ एकोस्टिक्सले प्लेटफर्मको समवेदनशीलतालाई ध्यानमा राख्दै यसको निर्माण हुने सटिक क्षेत्र खुलासा गरेको छैन । यसबारे गरिएको शोधबारे पनि विस्तृत विवरण सार्वजनिक गरिएको छैन ।